Druk artikel   E-pos storie aan 'n vriend

Pretoria

Suid-Afrikaners moet alles wat hulle koop om die frustrasies van beurtkrag te oorbrug van hul belasting kan verhaal.

Só eis bykans 500 mense wat ’n internetpetisie onderteken het waarin die Suid-Afrikaanse Inkomstediens (SAID) gevra gaan word om alle artikels wat aangekoop word om mense te help om midde-in die elektrisiteitskrisis normaal te funksioneer, teen belasting af te skryf.

Dié artikels sluit in kragopwekkers, gastoebehore, flitse, kerse, bystandsbatterye en batterye.

Mnr. Adrian Lackay, woordvoerder van die SAID, sê dié petisie met die nodige motiverings daarvoor sal aan die nasionale tesourie voorgelê word wat in oorleg met mnr. Trevor Manuel, minister van finansies, sal besluit of dit verder gevoer word.

“Die SAID pas die belasting toe wat deur die nasionale tesourie bepaal en deur die parlement goedgekeur word,” sê Lackay.

Die petisie kan gevind word by www.mypetition.co.za.