Druk artikel   E-pos storie aan 'n vriend

Oudpres. Nelson Mandela en pres. Thabo Mbeki hou hande vas op sy verjaardag gister in Qunu. Mnr. Jacob Zuma is links agter Mandela. (Foto: GCIS/Elmond Jiyane)

Verwante Berigte Spesiale bylae vier Madiba se 90 jaar

Qunu

Oudpres. Nelson Mandela het gister sy uitgerekte 90ste verjaardagvieringe voortgesit met ’n makietie vir uitgelese gaste by sy huis in Qunu in die Oos-Kaap.

Sowat 400 bevoorregtes het dié partytjie bygewoon.

Daar was ook gerugte dat die kletskoningin Oprah Winfrey en die Hollywood-akteur Will Smith vir Madiba sou verras het.

Hy het Vrydag ’n stil verjaardag saam met naaste familie en veral sy kleinkinders gevier.

Vriende soos die menseregtekampvegter adv. George Bizos en oudmin. Mac Maharaj wat saam met Mandela op Robbeneiland aangehou is, was gister teenwoordig.

Pres. Thabo Mbeki, sy adjunk, me. Phumzile Mlambo-Ngcuka, en die ANC-leier, mnr. Jacob Zuma, was daar om hom geluk te wens.

Die Mandelas se bure en plaaslike inwoners is by die kospotte toegelaat, maar hulle kon nie by die markiestent uitkom waar die feesvieringe gehou is nie.

Vrydag is drie beeste en “sekerlik meer as twintig” skape geslag vir die gaste wat aan ’n tradisionele Xhosa-maal sou smul.

Vrydag was ook die tiende herdenking van sy huwelik met Gra?Machel, sy derde vrou.

Sy geskenk van sy kinders en kleinkinders was ’n album met familiefoto’s en huldeblyke.

Dit is in ’n blikomslag saamgebind.

’n Derde museum ter ere van die oud-president is ook gister ’n hanetree van sy huis af onthul.