Druk artikel   E-pos storie aan 'n vriend

Wie sou ooit kon dink Mr Bean se gunsteling-ryding sou as retro-model herleef en ongekende sukses regoor die wêreld behaal?

En asof die sukses van die nuwe Mini nie genoeg is nie, word die mark met nog ’n nuwe model gepeper – dié keer die Clubman wat in sy oorspronklike gewaad ’n bykans ikoniese gevolg gehad het.

Die Mini Clubman met sy stasiewa-agtige voorkoms het heelwat meer toerusting, en pronk met ’n nuwe agterdeur wat na weerskante soos hangkasdeure oopmaak. En kyk mooi na sy voordeure – daar is nog twee kleiner deurtjies waarvan die skarniere agter is en die deure van voor af laat oopswaai om toegang tot agter te bewerkstellig.

Maar dis allesbehalwe ’n paneel-waentjie …

Die Clubman is ’n vyfsitplek-passasiersmotor met die kenmerkende groot laairuim agter wat nog beter benut kan word deur die sitplekke plat te vou. En omdat die hele motor langer is as die gewone Mini is daar meer as genoeg beenruimte vir die agterste passasiers.