Druk artikel   E-pos storie aan 'n vriend

BMW se X6 – of dan die wêreld se eerste sport-aktiwitetskoepee – is pas in Amerika bekendgestel. Egmont Sippel was daar om hom te ry. ’n Verslag volg aanstons.

Intussen het BMW ook hul relatief-nuwe X5 plaaslik met ’n splinternuwe 3.0-liter bi-turbo-diesel toegerus.

Hierdie enjin lewer 210 kW en 580 Nm vergeleke met die 3.0-liter tubodiesel se 173 kW en 520 Nm. Dis ’n stewige verskilletjie.

Maar die wonder van die saak is hoe suinig die bi-turbo met brandstof werk. Waar die turbo-enjin 8.1 liter/100 km suip, gebruik die bi-turbo net ’n titseltjie meer: 8.2 liter/100 km. CO2-uitlate vergelyk ook baie goed: 214 g/km vir die turbo, en 216 g/km vir die bi-turbo.

En dis ’n bi-turbo (alhoewel BMW na die enjin as ’n VTT verwys, oftewel ’n twin-turbo) omdat die twee turbo’s – ’n kleintjie en ’n grote – in serie moet skakel, en níé soos op petrol-enjins, in parallel nie.

Hier’s nog iets waarop BMW klem wil lê: die X5 3.0sd (soos die bi-turbo bekend staan) versnel in 7.0 sekondes van 0-100 km/h; Audi se Q7 4.2 V8 TDI doen dit in 6.4 sekondes.

Maar brandstofverbruik lyk ietwat anders. Waar die Audi 11.9 liter/100 km suip, verbruik die 3.0sd net 8.2 liter/100 km. Dis ietwat van ’n verskilletjie wat, in terme van brandstofpryse, nogal die beursie kan raak.

Met 85 liter in sy tenk, kan die X5 3.0sd onder optimale omstandighede ook digby ’n 1000 km of dalk meer haal, voor jy weer hoef op te vul – alhoewel die lewe natuurlik nooit heeltemal so werk nie.

Die X5 3.0d se enjin is terselfdertyd effe gekikker om die nuutgevonde gehalte van Suid-Afrikaanse diesel beter te benut. Vorige kragsyfers van 160 kW en 500 Nm is na 173 kW en 520 Nm opgeskuif.

Botsveiligheid is ook met ’n nuwe koprus verbeter, en die X5 bied voortaan ’n TV-opsie.

* Die X5 3.0sd kos R652 500. ’n M-Sportpakket is opsioneel vir omtrent R50 000 beskikbaar.