Druk artikel   E-pos storie aan 'n vriend

Mercedes-Benz se nuwe C-klas Estate, oftewel die stasiewa-weergawe van die C-klas, is pas in Suid-Afrika bekend gestel.

Motor-Rapport was ten tyde van die geleentheid in Amerika om BMW se nuwe X6 te beproef. ’n Volledige verslag oor die X6 volg volgende week. Intussen het ons darem die sedanweergawe van die C220 CDI-diesel vir ’n padtoets onder hande gehad. Dis dieselfde motor wat vroeër vanjaar ’n finalis in die SA Motor van die Jaar 2007-kompetisie was. Dis ’n goeie motor met vele verskuilde talente, veral wat botsveiligheid betref. Soos altyd het Benz nogmaals met nuwe, verbeterde oplossings vorendag gekom om impakskok te absorbeer, in dié geval veral in botsings van agter af. Die nuwe C-klas bied ook ’n lekker stil en gemaklike rit – en is, soos alle Mercs, uiters maklik om te bestuur. In dié opsig is dit veral die vloeiendheid van die stuur teen lae snelhede wat uitblink; die nuwe C is loutere plesier in parkeerareas, en in stadsverkeer. Ongelukkig raak die stuur ’n bietjie lig teen hoë snelhede en ja, ten spyte van ’n groter kajuit as voorheen gaan die C beknop voel as die nuwe Audi A4 middel vanjaar in onse mark verskyn. Die C-klas se grootste vaal kol is inderdaad dan ook die voorpaneel; ontwerp en materiale vertoon maar flou en goedkoop vergeleke met Audi-kajuite s’n. Soos altyd bied die C-klas Estate egter enorme pakplek, onder meer ook aangesien die Estate (teen 4596 mm) 15 mm langer as die sedan is. Dít, tesame met die langer dak, beteken dat die stasiewaens gemiddeld omtrent 150 kg swaarder as ekwivalente sedans is. Die C220 CDI en C63 AMG Estates daag eers in Julie in SA op. Intussen wissel die pryse van die res tussen R306 000 en R441 000. Dit sluit twee 4-silinder Kompressor-modelle in (albei met ’n 6-gang-handratkas of ’n 5-gang-outokas beskikbaar), asook drie V6’e, waarvan een ’n diesel is. Die V6’e dryf almal via ’n 7G-Tronic-outokas.

esippel@rapport.co.za