Druk artikel   E-pos storie aan 'n vriend

Verwante Berigte Mbeki se glips vererger die ongeluk SA paaie oud en pê gery

Parlementêre Beriggewer

’n Administratiewe foutjie wat pres. Thabo Mbeki begaan het in die promulgasie van ’n wysigingswet kos die Padongelukkefonds (POF) tot R10-miljoen per dag.

Dié wysigings, wat onder meer moet voorkom dat buitelandse toeriste die POF met buitensporige eise leeg tap, sloer al byna twee jaar. Dit sal die bedrag wat geëis kan word weens verlies aan inkomste deur ’n padongeluk tot R160?000 per jaar beperk.

Ook sal net mense wat “ernstige beserings” opgedoen het van die POF kan eis. Dié wysiging sal die POF jaarliks R2,3-miljard bespaar.

Byna 60% van groot eise – dié hoër as R5?miljoen – wat teen die POF ingestel word, is deur buitelanders. Die eise is meestal meer as R10-miljoen elk weens die swak wisselkoers, sê mnr. André Gernandt, finansiële hoof van die POF.

’n Switserse miljoenêr het vier jaar gelede ’n eis van R2,2 miljard teen die POF ingestel ná ’n motorfietsongeluk in Kaapstad. Die POF en die eiser sal in September ná arbitrasie in Switserland skik. Agterstallige groot eise van buitelanders het verlede jaar R575-miljoen beloop en dié van Suid-Afrikaners maar R157-miljoen.

Die Raad op Finansiële Dienste, waghond oor die korttermyn-versekeringsbedryf, het die afgelope week aan die parlementêre portefeuljekomitee oor vervoer gesê die POF is bankrot.

Mnr. Jacob Modise, die POF se uitvoerende hoof, het teenoor parlementslede erken die fonds se geld het al in Desember opgedroog – drie maande voor die einde van die boekjaar.

“Ons moet uitbetalings terughou omdat ons nie kontant het nie. Die POF is tussen die duiwel en die diep see. Ons moet die fort hou terwyl die wetlike aspekte nie gebeur soos dit moet nie.”

Die POF-wysigingswet is in 2005 goedgekeur, maar Mbeki het weens die departement van vervoer se onbeholpenheid per abuis die verkeerde klousules op 19 Julie 2006 gepromulgeer.

Mbeki het die aankondiging twee weke later herroep en ’n nuwe proklamasie uitgereik. Maar die Pretoriase hooggeregshof het bevind net die parlement kan ’n proklamasie herroep en verander. Die departement van vervoer en Mbeki beveg die uitspraak nou in die konstitusionele hof.

Mnr. Stuart Farrow, DA-LP, sê ’n maklike oplossing is dat die parlement die promulgasie herroep en ’n nuwe wysigingswet voorgelê word.

Die departement van vervoer dring egter daarop aan om op die konstitu-sionele hof se beslissing te wag.

“Hopelik gebeur dit in Mei. Indien nie sal ons aangaan (met die opstel van ’n nuwe wysigingswet),” sê mnr. Jeremy Cronin, ANC-LP en voorsitter van die portefeuljekomitee.