Druk artikel   E-pos storie aan 'n vriend

Adv. Gerrie Nel

Pretoria

Die polisie het glo twee van sy lede wat begin vanjaar betrokke was by die omstrede arrestasie van adv. Gerrie Nel, hoof van die Skerpioene in Gauteng, “onregverdig bevoordeel” deur hulle skielik te bevorder.

Altesame 106 polisielede onder leiding van kapt. Lana Els van Klerksdorp het ’n kollektiewe grief teen die polisie ingedien. Dít kom nadat konst. Ishmail Dawood die rang van inspekteur oorgeslaan het en bevorder is tot kaptein.

In dié grief wat deur die Suid-Afrikaanse Polisie-unie (Sapu) aangevoor is, word beweer Dawood, van die eenheid teen georganiseerde misdaad in Noordwes, se pos is nie geadverteer nie en dat hy nie daarvoor in aanmerking gekom het nie. Komm. Jackie Selebi, geskorste polisiehoof, het Dawood se bevordering onderteken nadat dit aan hom gestuur is.

Sr. supt. Ntebo Mabula, ’n kollega van Dawood wat ook betrokke was by Nel se arrestasie, is intussen bevorder tot direkteur. Ook kapt. Tsietsi Mano se bevordering tot senior superintendent is glo in ’n gevorderde stadium.

Nel is in Januarie voor sy vrou en kinders by sy huis in Garsfontein in hegtenis geneem deur meer as 20 polisielede, onder wie die drie bogenoemde mans, sonder dat daar ’n prima facie-saak teen hom was. ’n Week later is die saak teen hom in die hof uitgegooi.

Sr. supt. Pieter du Plessis, provinsiale hoof van kommunikasie in Noordwes, sê Mabula is op 1 November as provinsiale hoof van die speurdiens aangestel nadat dié pos vakant geraak het. Volgens Du Plessis is Mabula se pos soos enige ander pos geadverteer. Hy kon nie bevestiging kry van die bewerings dat Mano ook bevorder gaan word nie.

“Dawood se bevordering is deur die minister (van veiligheid en sekuriteit) goedgekeur ingevolge dieselfde regulasie waardeur speurder Piet Byleveld van super-intendent tot die rang van direkteur bevorder is.

“Dawood se bevordering spruit uit unieke misdaadondersoekmetodiek wat nie openbaar gemaak kan word nie,” sê Du Plessis.