Druk artikel   E-pos storie aan 'n vriend

Charl Langeveldt in aksie teen die Wes-Indiese Eilande in Januarie vanjaar op Nuweland. (Foto: Sharief Jaffer)

Verwante Berigte Smith sê Langes het groot steun Krieket: Vonke spat tuis, maar Graeme-hulle betree dié week ... Indiese leeukuil

Johannesburg

Die Suid-Afrikaanse krieketbaas, adv. Norman Arendse, het Charl Langeveldt gister snedig bygekom ná die Suid-Afrikaanse bouler se onttrekking aan die Suid-Afrikaanse toerspan na Indië omdat hy as kwotaspeler gekies is.

Arendse sê die die kwotastelsel het van Langeveldt die speler gemaak wat hy is.

“Daarom durf hy nie sy neus optrek vir transformasie nie,” het die krieketbaas gister gesê in reaksie op die jongste krieketstorm wat die afgelope week losgebars het.

Arendse, president van Krieket Suid-Afrika (KSA), het ’n striemende aanval op Langeveldt gedoen nadat dié 33-jarige swaaibouler hom Dinsdag weens kwotas aan die Protea-span onttrek het.

Langeveldt is verlede week in die nasionale span ingesluit nadat Arendse geweier het om die keurders se aanvanklike span – met vyf gekleurde spelers én André Nel daarin – goed te keur.

Nel het in die slag gebly toe die span gewysig moes word om KSA se beleid van ses swart spelers in ’n toergroep van veertien uit te voer.

Langeveldt het hom, ná vergaderings met die Suid-Afrikaanse spelersvereniging Saca, aan dié span onttrek en gedreig om internasionale krieket vaarwel te sê.

“As spelers het ons gewoonlik ’n goeie idee van of ons ’n kans het om gekies te word.

“Jy hoef maar net André se vertoningslys in toetse met myne te vergelyk en te kyk na die feit dat hy deel van die toetsplanne is en ek twee jaar lank nie ’n toets gespeel het nie,” het Langeveldt vroeër in ’n persverklaring gesê.