Druk artikel   E-pos storie aan 'n vriend

Mnr. Welile Nhlapo.

Washington

Die vryheid wat Suid-Afrikaners nou het, mag nie ten koste van die wit mense in die land geskied nie, het Suid-Afrika se ambassadeur in Amerika, mnr. Welile Nhlapo, hier gesê.

Nhlapo het met die bekendstelling van ’n nuwe netwerk om Suid-Afrikaners in die buiteland betrokke te kry by hul geboorteland, Global South Africans, ’n pleidooi vir wit mense gelewer.

“Ek praat namens myself. Dit is ’n baie belangrike kwessie vir my,” het hy in die ambassade gesê nadat hy geluister het hoe drie wit Suid-Afrikaners van drie verskillende instansies gevra het dat mense by hul land betrokke raak.

“Ek staan hier as ’n trotse Suid-Afrikaner en hoor hoe my medelandgenote so positief oor ons land is. Op ’n manier is daar die vals indruk dat die vryheid wat Suid-Afrikaners geniet, ten koste is van ons landgenote. Dit mag nie gebeur nie,” het Nhlapo gesê.

Dit sal ook “verkeerd en selfs gevaarlik” vir die ambassade wees om nie Suid-Afrikaners hier op te spoor en in ’n gesprek met hulle te tree nie. Suid-Afrikaners moet die eienaarskap van hul land soos ’n kleinood hanteer, want net een groep kan die land verwoes – Suid-Afrikaners self.

Mnr. Dondo Mogajane, senior adviseur in die kantoor van die Wêreldbank se direkteur vir Afrika, het by ’n bekendstellingsgeleentheid by die instansie gesê al Suid-Afrika se probleme kom neer op een ding: die begrotings van departemente word nie bestee nie, want daar is ’n tekort aan vaardighede en vermoë. Die uitdaging is om wit mense wat die land verlaat het en wie se vaardighede nooit vervang is nie, terug te lok.