Druk artikel   E-pos storie aan 'n vriend

Mnr. Jac Rabie en sy vermoorde vrou, Sandra.

Johannesburg

Die dood van oudminister Jac Rabie die afgelope week is die einde van traumatiese 15 maande vir sy familie.

Alles het in Desember 2006 begin toe dié eertydse minister van bevolkingsontwikkeling in die driekamer-parlement se raad van verteenwoordigers se tweede vrou, Sandra Schofield-Rabie (47), in hul huis in Boksburg vermoor is.

’n Vyftienjarige familielid en nog twee mans is kort ná die moord in hegtenis geneem.

Rabie se seun, Brian, het die afgelope week vertel die skok en trauma van die moord en die gesloer van die hofsaak was vir sy pa ’n marteling.

“Die verhoor moes in Oktober plaasgevind het, maar dit is uitgestel tot April vanjaar.

“Sy moed het in sy skoene gesak en hy het skielik agteruit begin gaan.”

Die 69-jarige Rabie se gesondheid het verder verswak toe sy eerste vrou, Angelina Lius, met wie hy weer ’n goeie vriendskapsverhouding gehad het, op 29 Maart oorlede is.

“Hy is op dieselfde dag as wat die verhoor moes begin (14 April) in die hospitaal opgeneem.

“Die emosionele trauma en stres het sy gesondheid gekelder en hy is Dinsdagaand dood.”

Maar Brian sê ondanks alles wat gebeur het, het die tragedies daartoe bygedra dat die Rabie-familie die afgelope jaar hegter bande kon smee.

Hy weet nie wat nou met die verhoor van sy familielid gaan gebeur nie.

Rabie was die hoofgetuie en die verhoor moet in Oktober vanjaar begin.

“Ons het die jong man maar afgesny van die familie.

“Dis moeilik om te verstaan hoekom hy so iets gedoen het,” het Brian gesê.

Mnr. Pik Botha, oudminister van buitelandse sake, was van die politici wat die afgelope week hul medelye aan die Rabie-familie te betuig het.

Rabie het in 1969 die politiek betree en in 1978 by die Arbeidersparty aangesluit.

Later is hy na die Nasionale Party.

Hy was minister van bevolkingsontwikkeling tot sy uittrede uit die politiek in 1994.

• ’n Verassingsdiens vir Rabie word Saterdag in die Reigerpark-gemeenskapsaal in Boksburg gehou.

Die diens begin om 10:00.