Druk artikel   E-pos storie aan 'n vriend

Verwante Berigte Baie 'gewalg', ANC trots op Zuma se agste plek

Johannesburg

Die wêreldberoemde Paralimpiese atleet van Suid-Afrika Oscar Pistorius het met sy kunsbene vir hom ’n plek tussen die tydskrif Time se honderd invloedrykste mense ter wêreld losgenael.

Volgens Time word hy beskou as die 23ste invloedrykste persoon ter wêreld in 2008 en die invloedrykste sportpersoon.

Pistorius, wat pas terug is in die land nadat hy Dinsdag en Woensdag in Lausanne, Switserland, by die appèlsaak teen die IAAF voor die hof vir arbitrasie in sport (CAS) was, sê hy was eers geskok oor die nuus dat hy Time se lys van invloedrykes gehaal het.

“Ek kon dit amper nie glo toe my bestuurder, Peet van Zyl, my in Lausanne vertel Time beskou my as die 23ste invloedrykste persoon. Ek het nooit in my wildste drome só iets verwag nie.”

Time het Van Zyl per e-pos laat weet.

“Dit is vir my ’n fantastiese voorreg en eer,” sê Pistorius.

Mnr. Erik Weihenmayer, die enigste blinde persoon wat Everest uitgeklim het en Pistorius voorgestel het, skryf Pistorius het die hart van ’n ware kampioen en dat hy daarin geslaag het om die nadeel van gestremdheid in ’n voordeel om te swaai.

“Ons moenie vergeet wat ’n atleet gróót maak nie.

“Dit is te maklik om Pistorius se sukses aan tegnologie toe te skryf. Sommige mense kry sekere talente deur geboorte en omstandighede, maar dit is wat jy daarmee doen, die ure se toegewyde oefening, die strewe om die beste te wees, wat in die hart van ’n ware kampioen is.”

Pistorius beklee ook die derde plek op Time se lys van helde en pioniers.

Slegs Brad Pitt en Angelina Jolie en Oprah Winfrey word op dié lys as meer invloedryk beskou.

Ander sportmanne wat die lys gehaal het, is die tennisster André Agassi, die wenner van sewe Tour de France-fietswedrenne, Lance Armstrong, en die AC Milan-sokkerspeler Kaka.

Pistorius, wat tans nog in ’n stryd gewikkel is om aan vanjaar se Olimpiese Spele (vir nie-gestremde atlete) deel te neem, is verlede jaar benoem vir ’n eerbewys in die Laureus-wêreldsportakademie se kategorie deurbraak van die jaar.

• Ander voorste Suid-Afrikaners wat die lys gehaal het sedert dit in 2004 uitgereik word, is oudpres. Nelson Mandela (2004 en 2005); pres. Thabo Mbeki (2005); die medikus Jacques Rossouw (2006); die sakeman Cyril Ramaphosa (2007); en die president van die ANC, mnr. Jacob Zuma (2008).