Druk artikel   E-pos storie aan 'n vriend

Me. Najwa Petersen is die vermeende meesterbrein agter die dood van die musieklegende, Taliep Petersen. Hier is sy die afgelope week in die hof. (Foto: Nasief Manie)

Kaapstad

’n Klomp waardevolle goed wat nié gesteel is nie het die veteraanspeurder supt. Piet Viljoen laat besef Taliep Petersen is nie in ’n gewone huisrooftog doodgeskiet nie.

Die duur selfone, sonbrille, geld en paspoorte wat die “huisrowers” volgens me. Najwa Petersen net so in die kluis gelos het, het Viljoen daarvan oortuig dat daar meer agter die moord op die teaterlegende skuil.

“Daardie artikels sou nooit in die kluis gewees het as dit ’n regte huisrooftog was nie. Ek sal 100 dossiere gaan haal oor huisrooftogte. ’n Huisrower los nie so iets nie,” het hy in die moordsaak teen Najwa en haar medebeskuldigdes, Abdoer Raasiet Emjedi, Waheed Hassen en Jefferson Snyders getuig.

Toe Najwa weier om haar “sakefoon” vir die polisie te gee vir ontleding, het Viljoen haar begin verdink. Toe hy wel die foon kry, het hy vasgestel die laaste oproep wat die aand van Taliep se moord gemaak is, was na Faheem Hendricks, die selferkende middelman wat die huurmoord gereël het.

Faheem se nommer was uitgevee, maar kon nogtans herwin word. “Dit het ons op die spoor gesit om die moord op te los,” het hy gesê.