Druk artikel   E-pos storie aan 'n vriend

Pretoria

Flippie van Rooyen, seun van die pedofiel Gert van Rooyen, sal op 8 Julie op parool vrygelaat word nadat hy sewentien jaar uitgedien het van ’n lewenslange vonnis weens die moord op ’n vyftienjarige Zimbabwiese meisie.

Mnr. Manelisi Wolela, woordvoerder van die departement van korrektiewe dienste, het sy vrylating dié week bevestig.

Al wat dit kan verhinder, is as die paroolhersieningsraad, wat aanstaande week vergader, die besluit tersyde stel.

Die nuus oor Van Rooyen se vrylating is deur rolspelers by onder meer die nasionale vervolgingsgesag met skok en verbasing begroet juis omdat nóg twee vonnisse aan Van Rooyen opgelê is terwyl hy ’n gevangene in die Pretoriase Sentrale Gevangenis was.

Die een vonnis was weens meineed en die ander weens die besit van ’n rewolwer en ammunisie wat in sy tronksel gevind is.