Druk artikel   E-pos storie aan 'n vriend

Mev. Regina Catharina (Reg) Lehmann (née Janse van Rensburg). (Foto: Craig Nieuwenhuizen)

Pretoria

’n Verswakte 86-jarige miljoenêr is dood enkele dae voordat sy 52-jarige bruid ingevolge ’n hofbevel hul huwelikstatus na buite gemeenskap van goedere moes verander het.

Dit beteken dat mev. Regina Catharina (Reg) Lehmann (née Janse van Rensburg) waarskynlik al mnr. Herbert Bruno Otto Lehmann, met wie sy op 7 April verlede jaar binne gemeenskap van goedere getroud is, se bates erf.

In hofstukke voor die Pretoriase hooggeregshof is vroeër aangevoer sy boedel beloop minstens R19 miljoen.

Regter Chris Botha het mev. Lehmann in November verlede jaar gelas om hul huwelikstatus binne drie maande na buite gemeenskap van goedere te wysig.

“As dit bewerkstellig kan word, is ek tevrede dat enige nadeel wat mnr. Lehmann vanweë sy huwelik kan ly, besweer sal word,” het die regter gesê.

Mnr. Louis Benn, eksekuteur van mnr. Lehmann se boedel, het die afgelope week bevestig dat mnr. Lehmann op 20 Februarie oorlede is, maar het geweier om te sê of sy vrou hul huwelikstatus voor sy dood laat wysig het omdat dit “vertroulike inligting is wat ek nie sommer so kan bespreek nie”.

Mnr. Johan Botha, die rekenmeester wat vroeër as mnr. Lehmann se curator bonis aangestel is, het by navraag aan Rapport bevestig dat ’n aansoek om die egpaar se huwelikstatus te wysig nooit aan hom as party beteken is nie. “Sover ek weet, het mnr. Lehmann gesterf sonder dat sy huwelikstatus gewysig is,” sê hy.

Dit kom nadat mnr. Botha vroeër hof toe is om die egpaar se huwelik nietig te laat verklaar omdat hy geglo het dat mnr. Lehmann nie by sy “volle verstand” was toe hy getroud is nie. Mnr. Lehmann, wat aan Alzheimersiekte gely het, is sonder mnr. Botha se medewete getroud.

Regter Botha het adv. Hans Fabricius, SC, aangestel om ’n onderhoud met mnr. Lehmann te voer. Fabricius het ’n onafhanklike verslag by die hof ingedien waarvolgens hy aangenaam verras was deur mnr. Lehmann se liggaam-like en verstandelike toestand. Volgens hom was mnr. Lehmann gelukkig getroud.

Regter Botha het mnr. Botha se aansoek met koste van die hand gewys en ’n versoek geweier dat ’n dokter mnr. Lehmann ondersoek om sy toestand te bepaal. Die regter het wel gelas dat die huwelikstatus verander moet word nadat mev. Lehmann aangebied het om dit te doen.

Sy kon nie die afgelope week vir kommentaar bereik word nie.

Mev. Lehmann het vroeër in ’n openhartige onderhoud aan Rapport gesê sy is geen fortuinsoeker nie, maar ’n vrou wat haar lewe aan die versorging van ander gewy het. Sy het nie die hart gehad om vir mnr. Lehmann nee te sê toe hy haar gevra het om te trou omdat hy nie in ’n tehuis wou gaan woon nie. “Ek het op my manier vir hom lief geword.”

Mnr. Lehmann het geen kinders nie.