Druk artikel   E-pos storie aan 'n vriend

Parlementêre Beriggewer

Georganiseerde misdaad is van só ’n aard dat Suid-Afrika nie sonder die Skerpioene kan klaarkom nie.

Dít is regter Sisi Khampepe se eerste gevolgtrekking in haar verslag.

Volgens Khampepe is die direktoraat vir spesiale ondersoeke (DSO) gestig weens die polisie se onvermoë om prioriteitsmisdaad te ondersoek; hul swak skuldigbevindingsyfer en korrupsie in eie geledere; omdat daar ’n behoefte was aan ’n troika-benadering in die stryd teen korrupsie en ook polisiekorrupsie en dit noodsaaklik was om hoogs professionele ondersoekers, ontleders en aanklaers te werf en behoorlik te vergoed.

Sy het in haar verslag geskryf bogenoemde omstandighede is steeds van toepassing en dat die bestaan van die Skerpioene “vandag net so geldig is soos op die dag van hul ontstaan”.

Khampepe het ook bevind:

• Die polisie se argument dat die DSO ongrondwetlik is, is ongegrond. Hoewel die Grondwet na “een” polisiediens verwys, beteken dit nie die polisie het die “eksklusiewe” reg om misdaad te ondersoek nie.

• Die Skerpioene moet onder die nasionale vervolgingsgesag (NV) funksioneer. Dít is nie strydig met die Grondwet nie.

• Die Skerpioene het landsveiligheid bedreig deur agente en personeellede sonder veiligheidsklarings in ondersoeke te gebruik.

• Die Skerpioene het onwettig intelligensie versamel en moes dít onmiddellik staak.

• Die Skerpioene het onprofessioneel opgetree deur inligting aan die media te laat uitlek. Hul ondersoeke is gereeld “gesensasionaliseer” en het beskuldigdes se reg op ’n regverdige verhoor ondermyn.

• ’n Koördineringskomitee (MVS) moet aangewys word om die Sker-pioene te monitor, sake vir onder-soek te verwys en om samewerking tussen die DSO en die polisie te koördineer.

• Nes in die geval van die polisie moet die Onafhanklike Klagtedirektoraat se mandaat uitgebrei word om ook lede van die Skerpioene vir vergrype te ondersoek.