Druk artikel   E-pos storie aan 'n vriend

Regter Sisi Khampepe.

Verwante Berigte 'SA kan nie sonder dié eenheid klaarkom nie' Jaloesie kortwiek samewerking

Parlementêre Beriggewer

Pres. Thabo Mbeki was die Skerpioene se ondergang.

Politieke ontleders meen sy laksheid om regter Sisi Khampepe se aanbevelings twee jaar gelede in werking te stel, was die direktoraat vir spesiale ondersoeke (DSO) se eintlike doodsteek.

“As Mbeki gedoen het wat Khampepe gesê het, sou ons nie nou dié gesprek gehad het nie. Maar hy is ’n swak bestuurder wat nie kan prioritiseer nie. Hy was oorgerus oor ’n oorwinning by Polokwane (tydens die ANC se nasionale konferensie) en dís hoekom hy die aanbevelings nie in werking gestel het nie,” sê William Gumede, politieke kommentator en skrywer van die boek Thabo Mbeki and the Battle for the Soul of the ANC.

Khampepe het haar lywige verslag in die eerste helfte van 2006 aan Mbeki gegee.

Van die aanbevelings behels dat Mbeki ’n spesiale koördineringskomitee (MVS) moes aanstel. Dié komitee sou die DSO monitor en magmisbruik voorkom. Die komitee sou ook bepaal watter sake die DSO moet ondersoek en sou dus ’n oorsig-rol vervul het in die sin dat die Skerpioene nie self sou kies en keur tussen sake nie.

Sy het ook bevind Mbeki moes die wetstoepassingskomponent van die DSO onder die politieke leierskap van mnr. Charles Nqakula, minister van veiligheid en sekuriteit, plaas, terwyl me. Brigitte Mabandla, minister van justisie, steeds die aanklaers se politieke hoof bly.

Eerw. Frank Chikane, direkteur-generaal in die presidensie, het Maandag gesê Mbeki hét gedoen wat Khampepe aanbeveel het en het met van haar verskil oor die spesiale koördineringskomitee.

Prof. Adam Habib, politieke ontleder, meen Mbeki het wel die vernaamste bevinding nagekom deur die Skerpioene te behou.

“Maar van sy ingrypings was stil-stil en agteraf. Dié agter-kamer-politiekery is kenmerkend van Mbeki. Hy verkies om dinge in die geheim te doen en dit ondermyn vertroue in die proses.”

Die gebrek aan deursigtigheid gekombineer met die aanklagte teen komm. Jackie Selebi het enige hoop om die Skerpioene te red reeds maande voor die Polokwane-konferensie verydel, sê Habib.