Druk artikel   E-pos storie aan 'n vriend

Steve Hofmeyr. (Foto: Leon Botha)

Johannesburg

Dit het gister landwyd gegons oor die dood van die sanger Steve Hofmeyr.

Rapport is gistermiddag oorval met landwye navrae oor die gerug dat die gewilde sanger dood is. Selfs die nuusagentskap, Sapa, het Rapport gebel om die gerug uit te klaar.

“Maar,” sê me. Suzanne Rabey, persoonlike assistent van Hofmeyr, “hy is beslis nie dood nie.”

Sy sê die gerug het vroeg gistermiddag soos ’n veldbrand versprei. Volgens Rabey is Natasha, Hofmeyr se vrou, met oproepe oorval en was sy teen gistermiddag al moeg van al die navrae oor haar man se dood.

“Ek het vroëer met hom gesels. Hy het tans baie pyn, maar andersins is hy fine. Hy is vanoggend (Saterdagoggend) uit die hospitaal ontslaan. Ons het geen idee hoe die gerugte begin het nie,” het Rabey gisteraand aan Rapport gesê.

Hofmeyr is Maandagaand inderhaas in ’n Johannesburgse kliniekopgeneem nadat hy van erge maagpyn begin kla het.

Hy is met ’n geperforeerde dikderm gediagnoseer en daarvoor geopereer.