Druk artikel   E-pos storie aan 'n vriend

Vladimir Tretchikoff se kleindogter, Natasha Mercorio-Tretchikoff , Woensdagaand by die opening van 'n uitstalling van sy werke in Kaapstad. (Foto: Nasief Manie)

Kaapstad

Kunsliefhebbers wat van Vladimir Tretchikoff se werk hou, kan gerus wees dat hulle tog die kans gaan kry om ’n skildery te sien wat aanvanklik nie by die tentoonstelling van sy werk in Kaapstad ingesluit sou word nie.

Die eerste groot Vladimir Tretchikoff-uitstalling in dertig jaar op plaaslike bodem het Woensdag in Kaapstad begin.

Die plan was om op dié dag sy skildery Pink Magnolias op te veil.

Maar sy kleindogter, me. Natasha Mercorio-Tretchikoff, sê sy en die ander trustees van die Tretchikoff-trust het besluit om die skildery eerder aan die einde van die uitstalling te verkoop.

Die uitstalling duur nog tot 25 Julie in die Wembley Square-winkelsentrum terwyl die trust die skilder se naam lewend hou deur geldinsamelingsprojekte en slypskole.

“As sy kleindogter het hy my geïnspireer met die woorde: ‘Gee uiting aan jou passie. Doen waarvoor jy lief is. Tot elke prys’ ,” sê sy.

Natasha se passie is om jong Suid-Afrikaners met behulp van die trust die geleentheid te gee om hul passies te ontdek en daarop voort te bou.

• Vladimir Tretchikoff is opnuut in die nuus nadat sy skildery Fruits of Bali onlangs op ’n Sotheby’s-veiling in Kaapstad vir R3,74 miljoen opgeveil is. Die skildery was voor die veiling vir R250 000 tot R300 000 gewaardeer. Op dieselfde veiling is nog vyf van sy werke vir tussen R242 000 en R352 000 verkoop.

Die werk van Tretchi, soos hy deur familielede en vriende genoem is, word deur baie mense as kitsch bestempel, maar sedert sy afsterwe in 2006 behaal sy skilderye rekordbedrae.

Hy was ’n Russies gebore immigrant wat sestig jaar lank in Suid-Afrika gewoon het.