Druk artikel   E-pos storie aan 'n vriend

Ruan Maritz en sy ma, Karen, die afgelope week buite die Bellville-streekhof. (Foto: Steve Eggington)

Bellville

Wat hul seuns gedoen het, is verskriklik, maar hulle kan nié met die sogenaamde Waterkloof-vier vergelyk word nie.

“Ons skaam ons nie vir ons kinders nie. Hulle het van die begin af die waarheid vertel.”

Die ma’s van drie jong mans wat as matriekseuns in April 2004 ’n daklose doodgemaak het, was die afgelope week wéér bankvas agter hul kinders.

Mnre. Ruan Maritz (22), Benjamin Montagu-Fryer (21) en Dewald Smith (21) het mnr. Klaas Thomas (40) destyds ná ’n drinksessie só geskop en geslaan dat sy brein losgeskeur en hy dood is.

Mee. Karen Maritz, Riëtte Hoffman en Sonja Smith was Vrydag merkbaar teleurgesteld toe hul vonnisoplegging wéér uitgestel is.

“Die gewag, die spanning . . . dis erg,” sê Hoffman, Montagu-Fryer se ma.

“Dit moet nou net end kry,” voeg Smith by.

Hul seuns is aanvanklik van moord aangekla, maar aan strafbare manslag skuldig bevind.

Saam met hul families wag hulle nou vir 24 Oktober, wanneer streeklanddros J.B. Swanepoel hópelik hul hel van meer as vier jaar sal beëindig.

“Die een oomblik is jy by die werk en jy kry die oproep. Jou kind word aangekla van moord”

“Dit is baie moeilik om jou en jou kind positief te hou,” sê Hoffman. “Ek luister glad nie na wat ander mense sê nie.”

Die drie ma’s het die afgelope week, nes tydens die res van die verhoor, om hul seuns gekloek.

Hulle het suiglekkers uitgedeel en bemoedigende woorde in die rigting van die beskuldigdebank gefluister.

Die ma’s het sedert die begin van hofsaak, wat “die bergie-saak” genoem word, hegte vriendinne geword.

Hulle is besorg oor hul kinders se toekoms.

“Al drie ons seuns het nou ’n vaste werk,” sê Smith.

“Dit het hulle só lank geduur voordat mense hulle vertrou het.

“Al wat jy wil doen, is om die lewe saam met jou kind te geniet. Maar die gewag...”