Druk artikel   E-pos storie aan 'n vriend

Parlementêre Beriggewer

Indien die “nuwe ANC” se besluit om in vyf provinsies in te gryp met dienslewering verband gehou het, sou die kop van Mpumalanga se premier eerste gerol het.

Luidens die marknavorser Ipsos/Markinor se jongste peiling is mnr. Thabang Makwe-tla die ongewildste premier in Suid-Afrika. Net drie uit elke tien inwoners van Mpumalanga steun Makwetla en 66% meen sy regering dop die toets.

Mnr. Ebrahim Rasool is net so uitgebak by Wes-Kapenaars. Hy is die einste premier wat al sedert verlede Maandag die trekpas sou kry, maar sy stoel in Leeuwenhof amptelik nog warm sit. ’n Skrale 40% van die mense in die Wes-Kaap is tevrede met Rasool en nog minder (38%) met die provinsiale regering.

Volgende op die ongewildheidslys is die Gautengse premier, mnr. Mbhazima Shilowa, (met 49% steun) en me. Nosimo Balindlela, sy Oos-Kaapse ampsgenoot, wat die afgelope week ook moes hoor haar doppie is blykbaar geklink.

Ipsos/Markinor het dié peiling twee maande gelede gedoen en die uitslag is die afgelope week bekend gemaak. Me. Edna Molewa, premier van Noordwes, se gewildheid het die afgelope ses maande die meeste getaan – met 21% tot op 53%.

Interessant is dat die land se gewildste premier, me. Dipuo Peters van die Noord-Kaap, ook in die ANC se visier is. Tot 83% van dié provinsie se inwoners meen Peters doen voortreflike werk en 78% is doodgelukkig met die provinsiale regering.

Maar mnr. Gwede Mantashe, sekretaris-generaal van die ANC, het Woensdag op ’n in-ligtingsessie vir fondsbestuurders in Kaapstad te kenne gegee die party sal ook hiér moet ingryp.

Benewens die Wes-, Oos- en Noord-Kaap is die Vrystaat en Noordwes ook deel van die ANC se “pakket van ingryping” om die party se vertoning in dié provinsies te verbeter.