Druk artikel   E-pos storie aan 'n vriend

Mnr. Ebrahim Rasool kan sy tasse al hierdie week pak by Leeuwenhof. (Foto: argief)

Verwante Berigte 'Nuwe ANC' se ingryping gaan nie oor dienslewering

Kaapstad

Die Spook van Leeuwenhof wat drie Wes-Kaapse premiers uit die spog-premierswoning in Kaapstad gedwing het nog voordat hul ampstermyn verstryk het, spook nou ook kliphard by mnr. Ebrahim Rasool.

“Ja, om te bedank is steeds ’n opsie,” het Rasool Vrydagaand in die Paarl teenoor Rapport erken.

Rasool, wat tot dusver hardnekkig vasskop teen die ANC se nasionale uitvoerende komitee (NUK) se besluit dat hy eerder moet bedank, het in die Paarl die sterkste moontlike aanduiding gegee dat hy bereid is om Leeuwenhof, die ampswoning van die Wes-Kaapse premier, te verlaat.

Terwyl Rasool aanspraak daarop kan maak dat hy die naaslangsdienende premier van die provinsie is, is hy ook een van die politieke slagoffers van die Spook van Leeuwenhof. Dit is nog net Hernus Kriel wat sy volle termyn in Leeuwenhof kon uitdien.

Mnr. Gerald Morkel het net drie jaar en ses maande gehou voordat die Jurgen Harksen-sage sy verblyf in Leeuwenhof beëindig het.

Mnr. Peter Marais, wat Morkel opgevolg het, het ses maande en drie dae gehou voordat hy afgedank is ná die straatnaamdebakel.

Mnr. Marthinus van Schalkwyk was een jaar en tien maande die gas van Leeuwenhof voordat hy deur Rasool vervang is.

Oor die druk op hom om te bedank sê Rasool: “Ons dink almal ons is groot en onmisbaar in die ANC, maar eintlik is ons niks vergeleke met die groot leiers wat die ANC opgelewer het nie.

“Elkeen van ons wat aspireer om leiers te word, moet die vraag kan vra of ons bereid is om daai opofferinge te maak wat ’n Nelson Mandela gemaak het. As ons daardie vraag opreg kan beantwoord, kan ons onsself toevertrou met leierskap. Indien nie, dan moet ons miskien sê daar is ander wat beter leiers is.”

Die NUK is onkant betrap deur Rasool se weiering om te bedank. Toe dit duidelik word dat hy nie bes gaan gee nie, het die Mcebesi Skwatsha-faksie (die pro-Zuma-groep in die Kaapse wetgewer) begin koukus met lede van die DA om ’n mosie van wantroue in Rasool te ondersteun. Twee DA-lede het gister aan Rapport bevestig daar is gevra dat “ ’n moontlike pakt” gevorm word om Rasool uit die kussings te lig.

Rapport het ook betroubaar verneem dat mnr. Robin Carlisle, DA-voorbok in die Kaapse wetgewer, ten gunste van só ’n ooreenkoms was, maar die DA se nasionale leierskorps het besluit dat hul lede eerder buite stemming moet bly as ’n mosie teen Rasool ingedien word.

Dit het die wind uit die seile van die Zuma-faksie in die Kaap gehaal en Rasool se hande verder gesterk. Dit beteken dat Rasool net uit vrye wil sy tasse kan pak en nie deur die NUK gedwing kan word om te bedank nie.

Me. Helen Zille, DA-leier en burgemeester van Kaapstad, het gistermiddag aan Rapport gesê: “Dis ’n interne saak van die ANC en nie ’n beginselsaak nie. My posisie is baie duidelik en ek het dit so aan Theuns Botha (DA-leier in die Wes-Kaap) oorgedra dat ons nie by die ANC se faksie-gevegte betrokke gaan raak nie.”

Terwyl Rasool aandring op redes waarom hy afgedank moet word, het prof. Ben Turok, ANC-LP, Rasool woes ingeklim en gesê hy moet waai.

“Rasool het afgedwaal van die partydissipline en -waardes. Hy het ’n Afrikaan/Kleurling-alliansie as strategie vir die provinsie gebruik. Dit druis in teen die beginsels van die ANC en ook van die land omdat ons vir nie-rassigheid staan.

“Tweedens, as voorsitter van die ANC in die Wes-Kaap het Rasool nie die dissiplinêre kode van die ANC-grondwet eerbiedig nie. Dit het veroorsaak dat onverantwoordelike elemente verskeie veldtogte gevoer het wat die leierskorps in geheel en veral Rasool se posisie ondermyn het.

“Derdens het hy weerbastige ANC-lede toegelaat om voort te gaan met hul doen en late wat die ANC op grondvlak geskaad het.”

Me. Lynn Brown word as die voorste kandidaat beskou om die leisels by Rasool oor te neem. Sy was destyds ook die ANC se burgemeesterskandidaat teen mnr. Peter Marais en het in die verkiesing ’n liederlike drag slae op die lyf geloop.