Druk artikel   E-pos storie aan 'n vriend

Melissa Ward (23) as 17-jarige Storm-model in Johannesburg. (Foto: Sharief Jaffer)

Kaapstad

Asof dit nie genoeg is dat die Bokke tweede viool speel teen die All Blacks nie, het ’n All Black-speler nou ook ’n Suid-Afrikaanse model se voete onder haar uitgeslaan.

Oor ’n paar maande tree die 23-jarige Melissa Ward, ’n Johannesburgse model, in die huwelik met die 27-jarige Sione Lauaki, voorryman van die All Blacks.

Skertsend word daar na hulle as die “skoonheid en die ondier” verwys, want Lauaki trap die skaal op ’n stewige 119 kg en sy bo-arms is vol tatoeëermerke.

Slegs haar Kaapse familie en intieme vriende het geweet van dié twee se verlowing in Desember verlede jaar. Hulle trou op 21 Maart in Nieu-Seeland.

Ward en Lauaki het verlede week op Nuweland saam rugby gekyk toe die All Blacks en die Springbokke mekaar in ’n Drienasies-rugbywedstryd gepak het.

Ward, wat al op 17 ’n model by die Storm-modelagentskap was, het reeds verskeie skoonheidstitels verower.

Die twee is in Desember 2006 in Johannesburg deur gemeenskaplike vriende aan mekaar voorgestel.

“Ek bly ’n stoere Springbok-ondersteuner, maar skree net vir die All Blacks as my Sione speel,” sê Ward.

Lauaki speel ook vir Waikato Chiefs in die Super-14-reeks en het reeds in 16 toetse vir Nieu-Seeland uitgedraf.

Volgens Ward vertrek sy al in September na Nieu-Seeland. “My ma (Melissa is die enigste kind) het my en Sione se huweliksplanne haar seën gegee.”