Druk artikel   E-pos storie aan 'n vriend

Een uit elke vier soogdierspesies loop die gevaar om vir ewig te verdwyn.

Die Wêreldbewaringsunie (IUCN) se jongste lys van bedreigde spesies dui daarop dat 1 141 van die 5 487 soogdierspesies op die aarde na aan uitwissing is.

Die situasie kan egter veel erger wees omdat onvoldoende data oor 836 van die soogdierspesies bestaan.

“Die persentasie soogdiere wat bedreig word, kan selfs hoër as 36% wees,” sê mnr. Jan Schipper, ’n wetenskaplike by Conservation International.

’n Studie deur byna 2 000 wetenskaplikes van 130 lande toon dat 188 soogdiere ernstig bedreig word. Sommige van die 450 soogdiere wat nou in die kategorie vir bedreigde spesies val, was nie voorheen in gevaar nie. Dit sluit onder meer die Tasmaniese duiwel in waarvan 60% in die afgelope tien jaar uitgesterf het.

“In ons leeftyd kan honderde spesies verdwyn as gevolg van die mens en dit wat ons aan die ekosisteem doen,” sê me. Julia Marton-Lefévre, direkteur van die IUCN.

Meer as ’n kwart van die soogdiere wêreldwyd word bedreig deur ’n verlies aan en die agteruitgang van hul habitat. Dit gebeur veral in Asië, Afrika en Suid-Amerika, waar die natuur plek moet maak vir ontwikkeling.

Daar is egter nie nét slegte nuus nie. Die Afrika-olifant is deesdae nie meer bedreig nie, hoofsaaklik omdat sy getalle in Suider-Afrika die hoogte ingeskiet het.

Die jongste IUCN-rooidatalys vir álle spesies dui egter daarop dat meer as 16 000 spesies nou bedreig word, waarvan meer as 3 000 in die kritieke kategorie val.