Druk artikel   E-pos storie aan 'n vriend

Albert en Themba wandel in die veld. (Foto: verskaf)

Port Elizabeth

’n Uitsonderlike vriendskap het die afgelope ses maande by ’n wêreldbekende Oos-Kaapse wildreservaat ontwikkel tussen ’n uitgegroeide skaap en ’n wees-baba-olifantbulletjie.

Só geheg is Themba die olifant en Albert die skaap aan mekaar dat hulle dag en nag in mekaar se geselskap deurbring. “Albert dink hy is ’n olifant. Hy doen alles wat Themba doen. Hy verorber byna alles wat die olifantjie eet, het lief geraak om in grond te rol en hou daarvan om in bosse rond te loop. Aan ander skape steur hy hom glad nie,” sê me. Lyndal Davies van die Shamwari-wildreservaat naby Paterson.

“Ons moes ons voet dwars sit toe Albert saam met Themba melk wou drink. Ons veearts sê dit sal sy dood beteken.”

Die enigste ding wat Albert nie saam met Themba wil doen nie, is om in water te speel, sê Davies.

Themba is sowat ses maande gelede na Shamwari se dierehospitaal gebring nadat sy ma in die Sanbona-wildreservaat in die Wes-Kaap dood is toe sy van ’n krans afgeval het. Die wesie is ’n ruk lank gemonitor om te kyk of iemand van sy ma se trop hom sou aanneem.

“Niemand het in Themba belang gestel nie en ons moes besluit of ons hom ’n wrede dood gaan laat sterf en of ons hom gaan probeer red.”

Dis hoe hy toe in ’n slegte toestand by Shamwari beland het. Dr. Johan Joubert, veearts van Shamwari, sê hulle het besluit om vir Themba ’n maat te kry omdat olifante tropdiere is en geselskap soek.

“ ’n Boer van die omgewing het Albert aan ons geskenk. Met hul eerste paar ontmoetings het Themba slurp omhoog ’n dreigende houding teenoor Albert aangeneem en die skaap het padgegee.”

Maar toe maak hulle vrede en nou is hulle onafskeidbaar. “Gelukkig dink Albert hy is ’n olifant en dink Themba nie hy is ’n skaap nie.”

Themba gaan oor sowat twee jaar weer aan ’n trop wilde olifante voorgestel word terwyl Albert sal aanbly om siek diere by te staan.

Iemand sal Albert dan net moet oortuig hy is nie ’n olifant nie.

• ’n Dokumentêre program oor die twee se vriendskap word Donderdag en Vrydag op die DStv-kanaal Animal Planet uitgesaai.