Druk artikel   E-pos storie aan 'n vriend

Harare

Pres. Robert Mugabe se onregverdige en “arrogante” verdeling van kabinetsposte in Zimbabwe kan die ooreenkoms oor magsdeling kniehalter, het die Beweging vir Demokratiese Verandering (MDC) gister gesê.

Dié reaksie kom nadat Mugabe sleutelportefeuljes in die kabinet aan sy party, Zanu-PF, toegeken het.

Die staatskoerant het ’n lys in The Herald gepubliseer waarin 14 portefeuljes aan Zanu-PF toegeken word, insluitend die weermag, binne- en buitelandse sake, justisie, plaaslike regering en die media.

Aan die MDC is 13 portefeuljes toevertrou, waaronder konstitusionele en parlementêre sake, ekonomiese beplanning en ontwikkeling, arbeid en maatskaplike sake, sport, kuns en kultuur en wetenskap en tegnologie.

’n Derde party, die MDC-faksie van mnr. Arthur Mutambara, sal in beheer van onderwys en streekintegrasie, sake en internasionale handel wees.

Mnr. Nelson Chamisa, MDC-woordvoerder, sê die MDC het nog nie die lys goedgekeur nie.