Druk artikel   E-pos storie aan 'n vriend

Catriona Andrew op die stel van Finding Lenny.

Kaapstad

Fliekgangers kan solank begin springmielies skiet vir Paasnaweek. Nu Metro se topuitreiking vir daarna naweek is ’n plaaslike komedie met Barry Hilton in sy eerste fliekhoofrol.

Die fliek, Finding Lenny, is ook ’n nuutjie vir Catriona Andrew in haar eerste hoofrol op die silwerdoek.

“Met Barry in die rolverdeling is dit beslis nie ’n tragedie nie,” lag Catriona.

Die fliek word tans in Gauteng geskiet en die sokkerster Mark Fish maak ook sy verskyning as ’n sokkerspeler. Dit word deur Movi World vervaardig.

“Wat die fliek nóg meer besonders maak, is dat dit nie ’n klompie komediesketse is nie. Dit het ’n volledige storielyn oor ’n man wat alles verloor en dan op reis gaan om homself te vind. Hy besef ook wat werklik belangrik is in die lewe,” sê Catriona.

Haar wêreld is “op die oomblik mal”; sy is terselfdertyd met die verfilming van Erfsondes 2, waarin sy ook die hoofrol speel, vir SABC2 besig.

Op die vraag hoe sy haar teks vir Erfsondes 2 en Finding Lenny terselfdertyd leer, sê sy haar brein wéét al van woorde leer. “Jou brein is maar soos ’n spier wat jy baie oefen. Hoe meer jy dit doen, hoe sterker raak dit. Gelukkig het ek ook ’n bietjie van ’n fotografiese geheue.” Sy erken wel dat haar korttermyngeheue heeltemal oorwerk is.

“Dis nou vier of vyf maande van my lewe wat dit so woes gaan, daarna sal ek vir twee maande kan slaap,” lag sy.

Erfsondes 2 sou in November begin het, maar die vraag na die eerste reeks was só groot dat SABC2 besluit het om reeks 1 weer uit te saai. Reeks 2 word nou van Maart vertoon. ’n Derde reeks kan ook gemaak word.