Druk artikel   E-pos storie aan 'n vriend

Margate

In Suid-Afrika draai die wiele van geregtigheid soms stadig, “maar dit draai ten minstens nog”, sê die verbysterde seun van die vermoorde mnr. Heinrich Bense (70) van Margate nadat sy moordenaar 16 jaar ná die moord in hegtenis geneem is.

Bense is op 31 Maart 1992 met ’n kapmes in sy huis vermoor, vermoedelik nadat hy ’n inbreker op heter daad betrap het.

Sy vermeende moordenaar, Khela Armstrong Nzama (43), is Donderdag op aanklagte van huisbraak in Kagiso aan die Rand in hegtenis geneem.

Toe sy vingerafdrukke nagegaan is, is ontdek hy word weens verskeie ander misdade gesoek en dat dit ooreenstem met vingerafdrukke wat ná Bense se moord in sy huis gevind is. Nzama het glo intussen ’n verklaring oor Bense se moord afgelê.

’n Dankbare mnr. Trevor Bense (42) van Richardsbaai, die vermoorde se seun, sê die familie is stomgeslaan deur die inhegtenisneming.

“Wie my pa vermoor het, was nog al die jare vir ons ’n groot, tergende raaisel. Hy het geen vyande gehad nie.”

Hy het die polisie geloof vir hul puik werk.