Druk artikel   E-pos storie aan 'n vriend

’n Paar van Suid-Afrika se kritiek belangrike demokratiese instellings het MIV. Die politieke variasie daarvan.

Instellings wat die fondamente en mure van die demokrasie moet vorm, is besmet met ’n dodelike virus. As dit nie in remissie gedwing word nie, sal die liggaam van Suid-Afrika se demokrasie uitteer en sterf.

Die virus se lang naam is “politisering en transformasie van openbare en statutêre instellings”. Kort titel: ANC-kaderbeleid.

Die afgelope week het die land en die wêreld gesien hoe die virus reeds die SABC en die nasionale vervolgingsgesag (NV) besmet en siek gemaak het.

Dali Mpofu, SABC-grootbaas, skors vir Snuki Zikalala, nuushoof. Voor Zikalala by die deur uit is, skors die SABC-raad vir Mpofu.

Maar dié raad het reeds die swaard van afdanking oor sy kop ná die ANC se mosie van wantroue in hom voorverlede week.

Wanneer die treklorrie met mnr. Jacob Zuma se huisraad aanstaande jaar voor Tuynhuys stilhou, is hulle weg.

Watwou Radioteater; dis teater van die absurde.

En alles net oor die siniese manipulasie van die SABC vir politieke gewin – deur die Zuma-kamp én die Mbeki-kamp.

Die besmetting van die NV wat die afgelope week in die Vusi Pikoli-ondersoek oopgedek is, is om van siek te word. En maak mens depressief.

Want nou weet ons: Thabo Mbeki het uit sy pad gegaan om die vervolging van komm. Jackie Selebi te verhinder, nie omdat daar iets mee geskort het nie, maar omdat Selebi ’n Mbeki-lojalis was/is.

Mbeki het dit nie vir Zuma gedoen nie want Zuma is sy aartsvyand. Die vervolging van Zuma het Mbeki soos ’n handskoen gepas.

Mbeki se bemoeienis met die Selebi-vervolging kom baie naby aan ’n skending van die grondwetlik heilige beginsel dat die staatshoof nie inmeng in die reg nie.

Dit stroop Mbeki van sy laaste bietjie demokratiese integriteit. Net ’n leë dop is nou nog oor.

Oudergewoonte het hy weer landuit gevlieg terwyl sy verbouereerde troepe moet lieg (Frank Chikane) en spartel (Frene Ginwala) om sy politieke knoeiery te verdoesel.

Die NV en die SABC is geen geïsoleerde gevalle van besmette instellings nie. Dis deel van ’n toestand wat bes moontlik reeds in die Mandela-jare ontkiem het en nou in alle felheid toeslaan.

Alles onder die dekmantel van die ANC se kaderbeleid – daardie sinistere doktrine opgestel deur Joel Netshitenzhe, Mbeki se nou vergete beleidshoof.

Wat bepaal het dat “ANC-kaders” in elke instelling, in elke uithoek van die SA bestel “ontplooi” moet word – nie om die instellings beter te maak nie. Of om die mense te dien nie.

Nee, om die hele land te onderwerp aan die dwingelandy van ’n magsbehepte, bemoeisieke ANC.

Die Land Bank, die openbare beskermer en Eskom is reeds op die kritieklys van instellings met MIV. Die howe en die media kan volgende wees.

Die SA Inkomstediens en die Reserwebank is genadiglik “MIV-negatief”. Is dit toevallig dat hulle nog goed funksioneer?

Wanneer die Zuma-groep volgende jaar oorneem, is daar presies een kans om die virus met massiewe dosisse anti-retrovirale middels te bestry.

Mbeki-kaders moet vervang word deur kundige kaders wat die land dien, nie die ANC en Zuma nie. Want As Zuma-kaders bloot oorneem by Mbeki-kaders en dis sake soos gewoonlik, gaan ons demokratiese staat vergaan.