Druk artikel   E-pos storie aan 'n vriend

Die grootste selfoonoperateur in Indië, Bharti Airtel, het Vrydag ontken dat hy ’n aanbod gemaak het om MTN oor te neem.

Dit volg op bespiegelinge voorverlede week in die Britse Financial Times dat Bharti ’n aanbod vir MTN oorweeg.

Mnr. Sunil Mittal, voorsitter van Bharti, het egter Vrydag ná ’n perskonferensie oor ’n onverwante kwessie gesê Bharti is nie gevra om ’n aanbod te doen nie.

Op die vraag of Bharti belang stel in MTN, het Mittal gesê dit is “sinneloos om hipotetiese vrae te beantwoord”.

’n Indiese koerant het egter Vrydag berig dat die naasgrootste selfoonoperateur in Indië, Reliance Telecommunications, ’n moontlike bestuursoorname van MTN oorweeg.

Luidens dié berig vergader MTN se direksie môre om sy opsies te oorweeg, wat sou insluit aanbiedinge om bestuursbeheer oor te neem.

’n Woordvoerder van Reliance het aan Reuters gesê die maatskappy evalueer voortdurend geleenthede wêreldwyd om organies of deur oornames te groei.