Druk artikel   E-pos storie aan 'n vriend

Tegniese ontledings toon dat die toekomstige bewegings van bankaandele tans op ’n mespunt gebalanseer is.

Ontleders is deesdae verdeeld daaroor of die plaaslike bankaandele tans ’n belegging regverdig.

Indien ’n belegger die negatiewe faktore in die ekonomie ignoreer, bied banke sekere waarde gegrond op die lae prysverdiensteverhouding en die hoë dividendopbrengste. Ander beleggers is egter steeds onseker oor die moontlikheid dat rentekoerse nog verder kan styg.

Volgens die maandelikse kersgrafiek van die bankindeks is die vlak van 30 000 baie belangrik. Beleggers op lang termyn verkies ’n maandelikse grafiek omdat dit betroubaarder is as weeklikse en daaglikse grafieke.

Tendenslyn A dien nou as pendulum vir die indeks. In die middel van 2006 is die belangrike weerstandsvlak van 30 000 gebreek, en dié vlak is nou ’n ondersteuningsvlak.

Sodra die indeks 30 000 nader, ondersteun beleggers die bankaandele. Dié reaksie stuur die sein uit dat langtermynhouers van bankaandele nie graag die indeks onder 30 000 wil sien nie. As die indeks egter tot onder 30 000 sak en daaronder konsolideer aan die einde van ’n maand, kan dit lei tot ’n nuwe vlaag van verkope.

Tendenslyn B dui die langtermyn-ondersteuning van die bankindeks aan. Ondersteuningslyn B beklemtoon die kritieke stand van sake. Let op die pitte van die kerse gevorm sedert Januarie 2008 tot nou. Hulle beweeg net bo die kritieke vlak.

Vir beleggers wat nie die indeks monitor nie, maar wel ’n belegging in een van die vier groot kommersiële banke wil waag, is R85 ’n kritieke ondersteuningsvlak vir Absa, R80 vir Standard Bank, R15 vir FirstRand en R100 vir Nedbank.

’n Langtermynbelegger kan miskien die water toets solank die aandele bo die bogenoemde vlakke hou.

Koop eerder aandele in klein hoeveelhede omdat die indeks nog nie definitiewe koopseine stuur nie.

Vir beleggers sal geduld en tyd leer of die indeks die slegte nuus verdiskonteer het en of die laagtepunte in plek is.