Druk artikel   E-pos storie aan 'n vriend

Kaapstad

Met net die Stormers wat verlede naweek ’n prysenswaardige vertoning kon lewer van die SA spanne wat in die Super-14-reeks in aksie was, was dit nogal ’n taaierige ronde om ’n vorm-gebaseerde vyftiental te kies.

Die Cheetahs en die Sharks het nogal aangeja en die Lions se moedige vertoning was amper terneerdrukkend, met dié dat ’n man deurgaans gevrees het iets goors moet nog gebeur.

Die Bulls had ’n blaaskans en die Stormers gemengde welslae: ’n bogemiddelde vertoning teen die High?landers, maar ’n yslike tol om te betaal met die verlies van nóg twee staatmakers – Schalk Burger en Tiaan Liebenberg. Dit ’n week nadat nóg twee sleutelmanne, J.D. Moller en Tonderai Chavhanga, lank op die krukkelys beland het.

Burger en Liebenberg was voor hul beserings onder die Kapenaars se uitblinkers en het genoeg gedoen om my ja-woord te kry op grond van verlede naweek se vertonings. Liebenberg se lynstaan-ingooie was effens verroes ná ’n ruk op die kantlyn, maar sy algemene spel was van die boonste rak.

Ons skielike haker-oorvloed is al deeglik bespreek, maar Andries Strauss van die Cheetahs het ook onder moeilike omstandighede ’n puik vertoning gelewer, terwyl Earl Rose se tweekuns teen die Brumbies dit moeilik gemaak het om hom oor die hoof te sien vir die meer bestendige Conrad Jantjes, vanjaar ons toonaangewende heelagter.

Jantjes beleef omtrent nie meer ’n swak oomblik nie, laat staan nog ’n swak wedstryd. Soos in die geval van Burger het ’n mens dié vorm al só gewoond geraak dat dit amper as vanselfsprekend aanvaar word.

Die beserings begin nou tel en dit lyk of ons spanne se stoom begin opraak: hoewel vanjaar se vertonings ’n verbetering is op dit waaraan ons gewoond begin raak het, is dit seker nie verspot om te hoop op beter nie.

My span is:
15 - Conrad Jantjes (Stormers)
14 - Odwa Ndungane (Sharks)
13 - Gcobani Bobo (Stormers)
12 - Jean de Villiers (Stormers)
11 - Jongi Nokwe (Cheetahs)
10 - Peter Grant (Stormers)
9 - Ricky Januarie (Stormers)
8 - Duanne Vermeulen (Cheetahs)
7 - Juan Smith (Cheetahs)
6 - Schalk Burger (Stormers)
5 - Andries Bekker (Stormers)
4 - Ross Skeate (Stormers)
3 - Brian Mujati (Stormers)
2 - Tiaan Liebenberg (Stormers)
1 - Heinke van der Merwe (Lions)