Druk artikel   E-pos storie aan 'n vriend

Johannesburg

Peter de Villiers het die twee hulpafrigters gekry wat hy wou hê. Hy het hom egter in die land se rugbybase vasgeloop oor die aanstelling van ’n persoonlike assistent in sy Springbok-bestuurspan.

Die Bok-bestuurspan is Vrydag bekend gemaak, met geen verrassings onder die nege name wat SA Rugby aangekondig het nie.

Die komitee wat die aanstellings van die Bokke se bestuurspan behartig het, krap egter nog kop oor wie die spanbestuurder en De Villiers se assistent moet wees.

Neil de Beer, een van De Villiers se vertrouelinge en ’n gewese SA o.21-bestuurslid, se naam is vroeër genoem as die Bok-breier se moontlike assistent, maar daar is besluit om dié pos vir eers nie te vul nie.

Volgens prof. Jannie Ferreira, voorsitter van die komitee wat die aanstellings behartig, word verdere moontlikhede ondersoek aangaande die pos.

“Ons is bang dat dié aanstelling ’n ernstige debat kan ontketen wat in niemand se belang is nie,” sê Ferreira.

“Dié taak sal intussen binne die strukture van SA Rugby behartig word.”

Rapport het vroeër vanjaar De Beer se beweerde betrokkenheid by ’n opspraakwekkende moordsaak in die Kaap in 1994 onthul.

Dít het sommige grootkoppe by SA Rugby onrustig laat rondskarrel en ’n besluit is geneem om meer oor die saak uit te vind. Ná ’n SA Rugby-ondersoek is besluit om die assistent-pos vir eers nie te vul nie.

Wat die spanbestuurder betref, sê Ferreira hulle soek nog na ’n geskikte kandidaat.

Dié aanstelling sal straks eers kort voor die eerste toets teen Wallis, op 7 Junie in Bloemfontein, gedoen word.

Die Bok-bestuurspan bestaan uit die hulpafrigters Gary Gold en Dick Muir, Peter Maimane (tegniese assistent), Charles Wessels (logistieke bestuurder), Craig Roberts (spandokter), René Lombard (fisioterapeut), Neels Liebel (kondisionering), Philip Malakoane (bagasiemeester) en Chris Hewitt (kommunikasiebestuurder).