Druk artikel   E-pos storie aan 'n vriend

Kaapstad

Anders as wat hulle oor Kapenaars skinder, dink ons allermins die son skyn by ons agterente uit, so daar was ’n senuagtige sluk hier neffens Nuweland toe my vyftiental, gekies op grond van algehele Super-14 vorm tot verlede naweek, ’n negetal Stormers bevat.

Weliswaar is dit g’n Bok-span nie; dalk wel ’n weerspieëling van ons spanne se bestendigheid. Die Sharks lewer ’n drietal voorspelers, die Bulls twee spelers en die Cheetahs een. Al drie dié spanne was wisselvallig, maar ’n paar spelers – ook by die Lions – het wel hoë standaarde gehandhaaf.

Die agterlyn, buiten een senter en skrumskakel, kies homself – deels weens die betrokkenes se peil, helaas ook weens min mededinging. Die Sharks- en Bulls-agterlyne was erg wisselvallig; die Lions en Cheetahs s’n het vrotsig verdedig.

Voorlangs was dit veel, veel moeiliker. Schalk Brits kry rakelings my ja-woord bo Bismarck du Plessis. Johann Muller haal my span net-net bo Bakkies Botha, dalk omdat moleste van die veld af my aandag ’n bietjie van Botha se spel afgetrek het.

Heinke van der Merwe, Gurthrö Steenkamp en Wian du Preez staan almal voor hom in my Springbok-ry, maar Beast Mtawarira het hom vir die eerste maal op dié vlak laat geld en ek hét ’n swak vir kultus-figure. Drie Zimbabwiërs in my span – wanneer kan ons dit van die Oos-Kaap sê?

Ook indrukwekkend was ’n kaboedel losvoorspelers: veral die Cheetahs Heinrich Brüssow, Duanne Vermeulen en Juan Smith, asook Cobus Grobbelaar van die Lions en Jacques Botes van die Sharks. Pierre Spies en Joe van Niekerk was goed onder die omstandighede.

Luke Watson was puik, maar tien Stormers is dik vir ’n daalder.

My span is:
15 - Conrad Jantjes (Stormers)
14 - Tonderai Chavhanga (Stormers)
13 - Jean de Villiers (Stormers)
12 - Meyer Bosman (Cheetahs)
11 - Bryan Habana (Bulls)
10 - Peter Grant (Stormers)
9 - Ricky Januarie (Stormers)
8 - Ryan Kankowski (Sharks)
7 - Wikus van Heerden (Bulls)
6 - Schalk Burger (Stormers)
5 - Andries Bekker (Stormers)
4 - Johann Muller (Sharks)
3 - Brian Mujati (Stormers)
2 - Schalk Brits (Stormers)
1 - Beast Mtawarira (Sharks)