Druk artikel   E-pos storie aan 'n vriend

Johannesburg

Fourie du Preez is en bly die beste skrumskakel in Suid-Afrika (en moontlik die wêreld), al was hy die afgelope paar maande nie op sy beste in die Super-14-reeks nie.

Die Bulls-kaptein se naam sal Saterdagaand uitgelees word wanneer die Bok-groep van 45 in Durban aangekondig word. Diegene wat daaroor wil brom, moet die groter prentjie raaksien.

Du Preez, wat met ’n handbesering sukkel, se vermoë om die tempo van die spel te beheer is ’n waardevolle bate onder enige stel reëls.

Sy skopvoet is ongeëwenaard onder skrumskakels in wêreldrugby en soos ons die laaste paar maande gesien het, is skoppe baie belangrik onder die proefreëls.

Ricky Januarie speel wel sy beste rugby in ’n wyle en Jano Vermaak en Rory Kockott het vanjaar sterk na vore getree, maar vir nou is Du Preez ’n moet in enige Bok-span.

Hoewel sommige meen die Bulls-kapteinskap het sy spel negatief beïnvloed, is Du Preez se leiers-eienskappe steeds sterk. Hy is ’n stil ou en gedy weg van die kollig af . . . en dis ook hier waar hy sy waardevolste insette lewer.

Saam kan Du Preez, Jean de Villiers, Schalk Burger en Victor Matfield (ná sy terugkeer uit Frankryk) as John Smit se regterhande seker maak die Bokke bly enduit op die regte spoor.

• Die ongelukkiges wat deurlopend stewig vertoon het, maar net-net my laaste vormspan van die seisoen misgeloop het, is Frans Steyn, Zane Kirchner, Odwa en Akona Ndungane, Derick Hougaard, Januarie, Vermaak, Pierre Spies, Wikus van Heerden, Jacques Botes, Joe van Niekerk, Heinrich Brüssow, Duanne Vermeulen, Johann Muller, Barend Pieterse, Schalk Brits, C.J. van der Linde en Heinke van der Merwe.

My span is:
15 - Conrad Jantjes (Stormers)
14 - Tonderai Chavhanga (Stormers)
13 - Jean de Villiers (Stormers)
12 - Meyer Bosman (Cheetahs)
11 - Bryan Habana (Bulls)
10 - Peter Grant (Stormers)
9 - Fourie du Preez (Bulls)
8 - Ryan Kankowski (Sharks)
7 - Cobus Grobbelaar (Lions)
6 - Schalk Burger (Stormers)
5 - Andries Bekker (Stormers)
4 - Bakkies Botha (Bulls)
3 - Brian Mujati (Stormers)
2 - Bismarck du Plessis (Sharks)
1 - Gurthrö Steenkamp (Bulls)