Druk artikel   E-pos storie aan 'n vriend

Johannesburg

Die Springbok-kaptein John Smit is gereed om sy loopbaan in Suid-Afrika voort te sit ná ’n seisoen in Frankryk.

SA Rugby en die Sharks is tans aan die onderhandel om Smit terug te bring Suid-Afrika toe, net soos wat die Blou Bulle onlangs met Victor Matfield gedoen het.

Smit, wat deur Peter de Villiers heraangestel is as Bok-kaptein nadat hy dié rol vier jaar lank onder Jake White vervul het, is sedert laat verlede jaar by Clermont Auvergne, die voorloper in Frankryk se eerste liga.

Die 30-jarige Smit se kontrak met Clermont verstryk egter eers in Junie 2009, wat die onderhandelinge heelwat meer ingewikkeld maak as wat die geval met Matfield was.

“Ek wil graag terugkom na Suid-Afrika en wil ook nêrens anders speel as by die Sharks nie,” het Smit die afgelope week aan Rapport gesê.

“Ek laat die hele aangeleentheid vir eers in SA Rugby se hande. Hulle moet met my klub onderhandel, want ek kan nie net die pad vat nie.”

Met De Villiers wat reeds aangedui het dat hy voorkeur aan spelers sal gee wat in Suid-Afrika speel, besef Smit sy Bok-loopbaan kan langer hou as hy terugkeer na sy geboorteland. Dít was ook ’n groot rede vir Matfield se besluit om weer ’n kontrak met die Bulle te onderteken.

“Toe ek hier weg is, was dit onder die indruk dat oorsese spelers vir die Bokke oorweeg kan word. Ek verstaan Peter se punt en sal daarom kyk of ek kan terugkom,” sê Smit.

’n Finale aankondiging oor Smit se toekoms word vandeesweek verwag. Hy sal in elk geval teen die einde van die maand na Suid-Afrika terugkeer vir die Bok-oefenkamp in Stellenbosch.

Volgens Smit het SA Rugby reeds ’n versoek by Clermont ingedien om hom vir internasionale diens beskikbaar te stel, maar die Franse wil hom so lank moontlik hou.

Clermont se laaste ligawedstryd is op 14 Junie.

’n Regulasie van die Internasionale Rugbyraad (IRR) kan Clermont egter dwing om Smit voor dan aan die Bokke beskikbaar te stel.