10/05/2008 20:59 - (SA)
Rugby: Groot geveg kom oor rugby-geld
De Jongh Borchardt
Johannesburg
’n Groot stryd om die verdeling van etlike miljoene rande se borggeld tussen die 14 provinsies word vandeesweek op ’n Presidentsraadvergadering van SA Rugby op die spits gedryf.
Die sogenaamde “Groot Vyf” – die Bulle, Leeus, Cheetahs, Sharks en Westelike Provinsie – voel hulle verdien ’n groter sny van die koek as die nege kleiner provinsies wanneer ’n vooruitbetaling van R30 miljoen uit die onlangse Supersport-ooreenkoms verdeel word.
Dié geld is vooruit betaal deur Supersport as deel van ’n ooreenkoms van R400 miljoen, wat aan hulle uitsaairegte gee tot en met 2014.
Die kleiner provinsies skop egter vas – en hulle sê die deel van dié geld wat aan die provinsies gaan, moet in 14 gelyke dele verdeel word.
Die groot unies voel hulle bied meer aan SuperSport omdat soveel meer wedstryde vanaf hul stadia uitgesaai word, terwyl baie van die kleiner unies se velde nie heeltemal geskik is vir regstreekse uitsendings nie.
Die vyf groot unies se bestuurshoofde het onlangs bymekaar gekom.
Hulle werk aan ’n voorstel wat eerskomende Woensdag aan die Presidentsraad voorgelê sal word. Dié vergadering is in Johannesburg.
Die groot unies kan hulself maar regmaak vir ’n hewige stryd, want dis te betwyfel of die kleiner unies sommer net so goedsmoeds sal aanvaar dat hulle minder van die geld kry.
Ander items op die agenda is die aanstelling van die Bok-keurders, SA Rugby se strategiese plan waarvolgens die maatskappy weer deel word van die unie en die Wêreldbeker-bod vir 2015.
|
Kies jou skool se provinsie
