Druk artikel   E-pos storie aan 'n vriend

Pretoria

Die Blou Bul-hakers Chiliboy Ralepelle en Bandisa Maku se insluiting bó die Stormers se Schalk Brits en Tiaan Liebenberg sal straks die grootste verrassing wees wanneer die Springbok-oefengroep aangekondig word.

Oregan Hoskins, president van die Suid-Afrikaanse Rugbyunie, maak die Bok-oefengroep Saterdagaand in Durban bekend.

Die groep sal waarskynlik uit 45 spelers bestaan, maar kan dit kan ook 47 wees.

Benewens die gevestigde Bokke het baie nuwe spelers die afgelope paar maande hul kleim afgesteek.

Liebenberg is tans beseer. Hy het verlede jaar sy Bok-buiging teen die Barbarians op Twickenham gemaak.

Brits – verlede jaar die kaptein van Peter de Villiers se Opkomende Bok-span in die Nasiesbeker-toernooi in Roemenië – was egter nog nooit deel van die nasionale span nie.

Brits se kanse om in die Bok-groep te wees blyk beter as dié van Liebenberg te wees, maar volgens betroubare inligting gaan hy nie die ja-woord kry nie.

Brits en Liebenberg het die afgelope paar maande vir die Stormers in die Super-14-reeks uitgeblink.

Ralepelle, wat besig is met rehabilitasie ná ’n besering, het al in twee toetse vir die Bokke gespeel, terwyl Maku verlede jaar as stut saam met De Villiers en die Opkomende Bokke getoer het.

De Villiers behoort die meeste van die spelers wat deel was van die suksesvolle Wêreldbeker-veldtog te kies vir sy eerste oefenkamp as Bok-afrigter.

Die oorsese Bokke Victor Matfield en John Smit, wat reeds as kaptein heraangestel is, is deel van De Villiers se planne.

Percy Montgomery en Butch James, wat albei ook oorsee speel, kan danksy hul ervaring ook na Stellenbosch genooi word.

Daar is glo planne om Montgomery as skopafrigter aan te wend sou hy nie as speler deur De Villiers ingespan word nie.

Ander “Euro-Bokke” soos Ashwin Willemse en Gary Botha kan egter weggelaat word, terwyl Albert van den Berg, Wynand Olivier en Akona Ndungane se gemiddelde Super-14-vertonings teen hulle kan tel.

’n Hele klomp skrumskakels sal straks genooi word, met Fourie du Preez en Ricky Januarie voor in die ry saam met Jano Vermaak en Rory Kockott, wat albei vanjaar voortreflik in die Super-14-kompetisie was.

Die Sharks-skrumskakel Ruan Pienaar gaan glo ook as losskakel en heelagter oorweeg word.

Die besering van die Stormers se oopkantflank, Schalk Burger, kan die weg baan vir die insluiting van Luke Watson bo Wikus van Heerden, Cobus Grobbelaar, Jacques Botes en Heinrich Brüssow.

Die Bokke trek volgende Sondag in Stellenbosch saam vir die oefenkamp van twee weke.

Spelers van die Sharks en die Stormers sal hulle later by die oefengroep aansluit indien hulle die halfeindronde van die Super-14 haal.

De Villiers sal ná twee weke die Bok-groep tot 30 verklein.

• Die Bok-oefengroep kan só lyk:

Agterspelers: Percy Montgomery, Conrad Jantjes, Zane Kirchner, Frans Steyn, J.P. Pietersen, Bryan Habana, Odwa Ndungane, Tonderai Chavhanga, Jongi Nokwe, Jaque Fourie, Jean de Villiers, Gcobani Bobo, Waylon Murray, Adrian Jacobs, Meyer Bosman, Butch James, Peter Grant, Fourie du Preez, Ricky Januarie, Ruan Pienaar, Rory Kockott, Jano Vermaak.

Voorspelers: Juan Smith, Duanne Vermeulen, Schalk Burger, Wikus van Heerden, Pierre Spies, Ryan Kankowski, Luke Watson, Hilton Lobberts, Bakkies Botha, Victor Matfield, Johann Muller, Andries Bekker, Danie Rossouw, B.J. Botha, Jannie du Plessis, C.J. van der Linde, Brian Mujati, Gurthrö Steenkamp, Heinke van der Merwe, Wian du Preez, Beast Mtawarira, John Smit (k), Bismarck du Plessis, Bandisa Maku, Chiliboy Ralepelle.