Druk artikel   E-pos storie aan 'n vriend

Hennie Otto. (Foto: Stuart Franklin/Getty Images)

Johannesburg

Hennie Otto is goed op koers om sy Europese spelerskaart vandag terug te wen nadat hy gister ’n voorsprong van vier houe geneem het in die Italiaanse Ope ná ’n skitterende 63 tydens die derde ronde.

’n Oorwinning sal boonop aan hom die eerste Europese titel van sy loopbaan besorg.

Otto is op -22, vier houe voor die Swede se Robert Karlsson en Christian Nilsson en die Spanjaard Alvaro Velasco nadat hy die laagste telling van die dag aangeteken het. Hy het sy eerste nege putjies in 33 houe (-3) voltooi, en daarna behoorlik voet in die hoek gesit. Oor die laaste nege putjies het hy ses voëltjies aangeteken vir ’n foutlose 30.

’n Sege vandag sal aan Otto vrystelling gee om vir die volgende drie jaar te speel op die Europese toer. Enigiets beter as sewende sal ook sy totale prysgeld vir die jaar genoegsaam opstoot om hom ’n outomatiese inskrywing in Europese toernooie te maak tot die einde van die seisoen.

Otto het ses weke gelede, by die Madeira Ope in Portugal, naby gekom aan sy eerste Europese sege, maar het die toernooi uiteindelik op die eerste putjie van ’n uitspeelstryd tussen hom en die Skot Steve Forsyth verloor.

Die 31-jarige vurige Suid-Afrikaner was baie tevrede met sy spel gister.

“Ek het die bal naby die vlaggies gekry met my ysters, en myself baie kanse gegee. Vandag (gister) het ek ook baie beter geset as vroeër in die week,” het hy gesê.

“Ek moet maar net môre (vandag) probeer speel soos wat ek vandag (gister) het.”