Druk artikel   E-pos storie aan 'n vriend

Chris Jonck duik gisteraand oor die Chiefs-doellyn vir een van die Lions se drie drieë. (Foto: Craig Nieuwenhuizen)

Ellispark

Die Chiefs se Super-14-veldtog vir 2008 is daarmee heen – verskeur deur ’n moeilike trop Leeus wat nie net hul neefs in die Kaap en Durban ’n groot guns bewys het nie, maar ook gewys het hulle is duidelik nie lus vir houtlepels en sulke nonsens nie.

Die oorwinning met 33-27 was die Lions se tweede van die seisoen, maar dit sou hulle selfvertroue ’n reuse-hupstoot gegee het ná weke van ploeter.

Verwoede verdediging en ontwrigtende lynstaanspel op die Chiefs se ingooie was gisteraand die tuisspan se groot troefkaarte, terwyl ’n rooikaart in die 64ste minuut aan die besoekers se Ben May, met Lelia Masaga se drie wat toe nie toegeken is nie, wat ook ’n groot rol in die Lions se sege gespeel het.

Die Lions se groot ysters was weer hul lostrio, met die agtsteman Willem Alberts aan die spits. Joe van Niekerk speel van sy beste rugby nóg en Cobus Grobbelaar móét nou naas Schalk Burger die beste suiwer oopkantflank in die land wees.

Die tuisspan het die wedstryd skitterend begin en was met 10-0 voor nog voor die Chiefs behoorlik aan die gang was.

Kort ná Earl Rose – skitterend op heelagter en in die kol met ál sewe sy skoppe pale toe – ’n strafskop deurgeklits het, is Chris Jonck oor vir die eerste drie.

Jonck het gaan afrond ná ’n skitterlopie van goed 30 m deur Alberts, wat weggebreek het van ’n skrum.

Tog was die Johannesburgers steeds skuldig aan ’n paar dom foutjies, al het dit gelyk asof hulle nie altyd saamstem met Dickinson se beslissings saamgestem het nie.

’n Paar strafskoppe teen die Lions het die Chiefs – wat 2 van hul All Black-ysters, Sione Lauaki en Sitiveni Sivivatu, ná ’n halfuur verloor het – kans gegee om terug te veg.

Aled de Malmanche het gaan druk ná ’n rolmaalbeweging en Stephen Donald het twee strafdoele en ’n doelskop bygevoeg om die besoekers kort voor die omdraaislag met 13-10 te laat voorloop, maar die Lions het kopgehou.

Alberts is in die 38ste minuut oor ná Rose sy skoppie in die kassie opgevolg en bemeester het. Hy het wyd gespeel na Van Niekerk, wat ’n paar verdedigers getrek het voor hy binnetoe gespeel het.

Jaque Fourie, terug ná vyf maande op die krukkerlys en so gevaarlik soos altyd, het gekonsolideer en die bal wyd gestuur, waar Alberts welverdiend oorgebars het.

Dié stukkie spel was uit die boonste rakke en het die Lions die nodige woema gegee vir die tweede helfte. Hulle het dit dan ook benut en toe Grobbelaar in die 54ste minuut gaan druk het – wéér ná ’n hangskop en met Franco van der Merwe en Van Niekerk prominent – was dit neusie verby vir die Kiwi’s.

Van der Merwe het ’n groot impak gehad nadat hy kort voor rustyd opgekom het.