Druk artikel   E-pos storie aan 'n vriend

Anthony Tuitavake breek deur twee Highlander-verdedigers om die Blues se bonuspunt-drie te druk in hul oorwinning van 40-15 in Dunedin. Met vyf drieë teenoor die twee van die Highlanders het die Blues gewys dat die Hurricanes nie kan waag om oorgerus te wees voor hul kragmeting in Auckland Vrydag nie. (Foto: Hannah Johnston/Getty Images)

Johannesburg

Die Highlanders moes gister droëbek toekyk hoe Nick Evans, verlede jaar nog een van hul eie helde, die Blues tot ’n goeie Super-14-sege op Carisbrook in Dunedin aanspoor.

Evans het 23 van die Blues se punte aangeteken. Hul sege met 40-15 beteken die manne van Auckland het nog ’n goeie kans om die halfeindronde te haal.

Had die span van Otago meer lywe op die spel geplaas, het hulle nie só ver verloor nie. En om Evans en sy makkers met halfhartige duikslae te probeer keer, is moeilikheid soek.

Die Blues, met die skrum?skakel Taniela Moa wat sy gevaarlike agterlyn goed aan die gang gekry het agter ’n pak wat oorheers het, het hul kanse benut en die Highlanders vyf keer onder hul eie pale laat staan.

Vir die Highlanders was dit weer ’n ander storie. Dit het hulle 50 minute geneem om behoorlik aan die gang te kom.

Ná twee vinnige drieë deur die buitesenter Aaron Bancroft en die hardwerkende flank Adam Thomson – beslis een van die Kiwi’s se blinkste nuwe sterre – wou-wou dit lyk of die tuisspan ’n tweede asem gekry het.

Die Blues het in daardie sta?dium vas aan die slaap gelyk, maar ’n paar harde woorde deur hul kaptein, Troy Flavell, was al wat nodig was en daarna het die Blues behoorlik geduik en met meer doelgerigtheid aangeval.

Intussen sal Nieu-Seeland se rugbybase vanoggend weer brom oor nóg een van hul topspelers wat weggekom het.

Evans gaan voortaan in Engeland speel en sluit hom by hordes van sy All Black-spanmaats aan wat, soos Suid-Afrika se bestes, net nie die aantrekkings van die pond en die euro kon weerstaan nie.