 |
||
|
16/05/2008 10:13 AM - (SA) US bring hulde aan doyen van SA sang
'n HULDIGINGSKONSERT ter nagedagtenis aan prof. George van der Spuy, doyen van SA sangonderwysers, wat op 19 Mei negentig sou word, word eerskomende Sondag aangebied. Dosente en nagraadse studente van die sangafdeling, Departement Musiek, Universiteit Stellenbosch (US) bied die konsert op 18 Mei om 16:30 in die Endlersaal aan. Die sangers is André Howard, Minette du Toit-Pearce, Vanessa Tait-Jones, Zanne Stapelberg en Barend van der Westhuizen. Benjamin van Eeden is die begeleier. Van der Spuy, eertydse hoof van die US Konservatorium, was een van Suid-Afrika se veelsydigste musici. Hy het hom as orrelis en sangsolis onderskei en naas sy universiteitsgrade 19 lisensiate ? in sang, klavier, orrel, begeleiding en musiekopvoedkunde ? aan Unisa en voorste Londense musiekkolleges verwerf. Met sy ryk baritonstem en fyn aanvoeling het hy as kunslied- en orato?riumsanger beïndruk. Hy was ook 'n begeleier van formaat. In 1939 het hy 'n BA-graad met musiek as hoofvak op Stellenbosch behaal. Hy was enkele jare onderwyser en kerkorrelis en daarna die eerste US-student om B.Mus. (1944) én M.Mus. (1952) te verwerf. Van der Spuy het van sy beste studente na skole in Salzburg vergesel, waar hy in 1982 self 'n sangkursus gelei het. In 1987 het sewe van sy studente onder die 26 internasionaal gekeurdes geëindig. Hy was ook lank 'n Unisa-musiekeksaminator en het tot voor sy dood nog privaat sangonderrig gegee. Eerbewyse aan hom sluit in 'n erepenning van die SA Akademie, 'n Unisa-erelisensiaat en die US-musiekdepartement se Parnassus-toekenning. Die Departement nooi Van der Spuy se oudstudente en lede van die publiek om die konsert gratis by te woon. Programme sal teen R20 beskikbaar wees.
|
|
||||||||||||||||||||||||||||
