Maar, sê mnr. Martin Schult?heiss, uitvoerende hoof van die Homenet-groep, hoewel instink ’n belangrike rol speel is dit nogtans belangrik om objektief te wees oor die gebied waarin dit geleë is. ’n Droomhuis kan gou in ’n wit olifant verander as die buurt vervalle raak. “In dié opsig sal ’n ervare eiendomsagent nuttige inligting kan verskaf oor ’n gebied se vooruitsigte. Welvarende skole met ’n sterk leerlingtal kan byvoorbeeld ’n goeie aanduiding van ’n gebied se vooruitsigte gee. Skole wat uitblink, weerspieël ’n aktiewe en dinamiese gemeenskap wat op sy beurt aanleiding gee tot ’n vraag na vermaaklikheids- en sakenodes.”

Plaaslike inkopiesentrums gee ook ’n goeie aanduiding van hoe gemeenskappe vaar. ’n Skoon sentrum wat goed onderhou is dui op ’n welvarende gebied terwyl verwaarloosde winkels of sluitingsuitverkopings nie ’n goeie teken is nie.

Die soort winkel is ook belangrik, sê Schultheiss. Gevestigde winkels wat ’n goeie toeloop geniet en luukse produkte in voorraad hou, is ’n teken van stabiliteit en voorspoed. Winkels wat talle gebruikte ware verkoop en geriefswinkels met lae voorraadvlakke behoort die gevaarligte te laat flikker.

“Residensiële en handelsontwikkeling in die buurt dui ook op vertroue in die gebied. ’n Buurt wat verval word gewoonlik deur ontwikkelaars vermy. En, net soos die geval met winkels, dui die soort ontwikkeling ook aan hoe ’n buurt vaar.”

Kopers moet ook in gedagte hou dat dit beter is om ’n kleiner of goedkoper huis in ’n goeie buurt te koop as ’n groter huis in ’n minder gegoede buurt. Dit verminder ’n koper se risiko en verbeter die vooruitsigte vir ’n gesonde opbrengs op belegging.

Laastens, sê hy, behoort kopers ook te vra vir ’n omvattende markontleding van die eiendom wat hulle in die oog het.