Die Afrikaanse skrywer C.J. Langenhoven het gesê: “As jy nie wil inhou nie moet jy naderhand uithou; en as jy nie kan aanhou met teëhou nie, moet jy maar tevrede wees om op te hou met byhou.” Sulke lewenswaarhede is kosbare juwele op ons lewensreis wat dikwels vol versoekings en uitdraaipaaie is.

Sensasionele berigte oor die vreemde goed wat mense doen en oorkom vul daagliks ons nuus. Ons reageer dikwels met gedagtes soos “ek doen darem nie dit nie” en “solank dit my net nie oorkom nie”, totdat ons skielik self daarmee gekonfronteer word.

Ons kom elkeen van tyd tot tyd te staan kom voor onbeplande uitdagings en ongevraagde versoekings.

Dit is dan dat dit ons baat om te onthou wat die Woord van die Here sê: “Hou kommer uit jou hart en vermy wat jou liggaam kan kwaad doen” (Pred. 11:10). En ook 1 Petrus 1:5+6: “...julle (moet) alles in die stryd werp om julle geloof te verryk met deugsaamheid, die deugsaamheid met kennis, die kennis met selfbeheersing, die selfbeheersing met volharding, die volharding met godsvrug ...” Dink voor jy doen, en moenie aanhou met iets wat jy weet skadelik is nie.

(Die skrywer bedien by Northern Cross Fellowship – 083 280 0294)