Só sê die internasionale sokkerbeheerliggaam Fifa in dokumente voor die Pretoriase Hooggeregshof.

Fifa doen aansoek om ’n interdik wat Metcash Trading Africa sal verhoed om die merk “2010 Pops”, waaronder hy sy suigstokkies bemark, verder te gebruik. Hy wil ook keer dat Metcash “2010” saam met afbeeldings van die landsvlag en sokkerballe mag gebruik om enige lekkernye te bemark.

Metcash verkoop verbruikersgoedere deur sy winkels, waaronder Cash & Carry, Trade Centre en Stax en Friendly Supermarket en verspreidingsentrums en het ’n jaarlikse omset van meer as R10 miljard.

Fifa voer aan dat Metcash inbreuk maak op sy handelsmerk “South Africa 2010 Bid”.

Metcash skep volgens Fifa die indruk dat hy ’n verbintenis met Fifa of die Wêreldbeker-sokkertoernooi 2010 het of dat die suigstokkies deur Fifa of een van sy agente vervaardig word.

Fifa beweer verder dat Metcash onwettig met hom meeding en probeer om onregmatig “spesiale promosie-voordele” uit die toernooi te kry.

Dit sal Fifa na verwagting meer as R5 miljard kos om die Wêreldbeker-sokkertoernooi aan te bied.

Dít word gefinansier deur die verkoop van uitsaairegte, borgskappe en regte om Fifa se intellektuele eiendom, waaronder handelsmerke, op handelsware te gebruik.

Volgens Fifa is dié inkomste daarvan afhanklik dat sy kliënte “ ’n mate van eksklusiwiteit” geniet met betrekking tot die voordeel wat hy trek uit sy verbintenis met die toernooi.

Met sy gebruik van die merk “2010 Pops” of “2010” tesame met ’n afbeelding van die landsvlag en sokkerballe op sy suigstokkies of enige ander lekkernye, bring Metcash volgens Fifa dié eksklusiwiteit in gedrang.

Só bedreig die suigstokkie die Wêreldbeker-sokkertoernooi en daaropvolgende toernooie.

Fifa beroep hom op die wet op handelsmerke en ’n verbod op lokvalbemarking.

Metcash het in hofstukke ontken dat hy lede van die publiek onder die indruk sal bring dat hy deur ’n borgskap of ander ooreenkoms aan Fifa of die toernooi gekoppel is.

Die maatskappy sê hy is al jare lank baie betrokke by sokkerontwikkeling.

Hy het besluit om sy suigstokkies met ’n sokkertema te bemark om voordeel te trek uit sy verbintenis met die sport.

Die suigstokkies word verder bemark onder die gevestigde Astor-handelsnaam as een van ’n reeks produkte wat net in Metcash se winkels beskikbaar is.

Die Astor-handelsnaam was in 2007 vir Metcash R127 miljoen werd.

Die suigstokkies is al in Desember 2004 bekend gestel en het al R3,3 miljoen vir Metcash verdien.

Metcash het glo die jaartal “2010” by sy suigstokkiebemarking ingesluit omdat ’n omvattende sokkerontwikkelingsprojek genaamd Shona Khona waarby hy betrokke is, dan ten einde loop. Die advertensiekoste vir dié projek beloop volgens Metcash R3,8 miljoen per jaar.

Die maatskappy bevestig egter dat dié besluit geneem is teen die agtergrond van die Wêreldbeker-sokkertoernooi wat sokkerkoors in 2010 tot ’n hoogtepunt sal voer.

Metcash beskuldig Fifa daarvan dat hy ’n monopolie wil hê oor die gebruik van goed soos die landsvlag en ’n jaartal.

As Fifa se vertolking van die relevante wetgewing aanvaar word, sal dit indruis teen grondwetlike beginsels soos vryheid van spraak en eiendomsreg op sy eie handelsmerk, sê Metcash.

Hoewel die saak na verwagting eers volgende jaar aangehoor sal word, sal dit rigting gee oor die beperkings op sakelui se reklame in die aanloop tot die toernooi in 2010.