Kredietversekering is ’n moeilike terrein waarna verder gekyk sal moet word. Dít was die kort opsomming van mnr. Nhlanhla Nene, voorsitter van die parlementêre portefeuljekomitee oor finansies, nadat die komitee Vrydag deur oudregter Peet Nienaber en verteenwoordigers van die versekeringsbedryf ingelig is oor ’n verslag wat ’n ondersoekpaneel van kundiges onder sy leiding onlangs daaroor uitgereik het.

Die verslag het bevind dat oortredings van regulasies wel in bedrywe soos die motorbedryf voorkom ten opsigte van die betaling van kommissie aan handelaars wat kredietversekering verkoop. Nienaber het egter beklemtoon dat versekering om kredietaan?kope te dek ’n unieke vorm van versekering is en nie deeglik in die wet omskryf word nie.

Daar is ’n gebrek aan helderheid en konsekwentheid in die wet en die doel van die ondersoek was nie om skuldiges te soek en teen hulle op te tree nie. Eerder is gepoog om die debat oor regulering te verhelder. Hoewel buitensporige kommissies soms betaal word, kan dit teenproduktief wees om ’n beperking of verbod op dié betaling te plaas, het Nienaber gesê.

) Die portefeuljekomitee sal voor die Julie-reses van die parlement ook kyk na die wysigingswetsontwerp op die versekeringsbedryf, wat onder meer gerig is op die afbakening van terreine van mediese versekeringsdekking tussen die versekeringsbedryf en mediese fondse.

Mnr. Gerhard Joubert, uitvoerende hoof van die Vereniging van Lewensversekeraars (LOA), het gesê die LOA erken dat probleme kan ontstaan as versekeraars ál die laerisiko-lede van mediese fondse met goedkoper mediese polisse weglok. Dit sal die hele grondslag van mediesefondsdekking ondergrawe, waar jonger en gesonder lede ouer lede subsidieer. Die LOA het reeds ’n terreinafbakeningsooreenkoms hieroor met die mediesefondsbedryf aangegaan.

Korttermyn-versekeraars het egter tot dusver weerstand gebied teen die beperking van hul bedrywighede op hierdie terrein. Die versekeringsmaatskappy Guard?risk is in die appèlhof vrygespreek daarvan dat hy ’n mediese fonds bedryf, maar die konstitu?sionele hof is nou daaroor genader. Die versekeringswysigingswetsontwerp kan help om groter duidelikheid oor die hantering van hierdie botsings tussen versekeringsmaatskappye en mediese fondse te bring.