Kritiek van die private sektor dat wetswysigings om optrede teen geldwassery doeltreffender vas te vat ’n groter administratiewe en finansiële las op baie ondernemings gaan laai, is deur verteenwoordigers van die staat verwerp.

Mnr. Pieter Smit, regsverteenwoordiger van die finan?siële-intelligensiesentrum, het gister in sy antwoord op die voorleggings oor wysigings aan die Wet op die Finansiële-intelligensiesentrum (Fica- of geldwasserywet) aan die portefeuljekomitee oor finansies gesê die bykomende laste word oordryf.

Die doelwit van die wysigings is om die sentrum in staat te stel om met administratiewe strawwe en inspeksies op te tree teen instellings wat nie wetsbepalings oor verslagdoening nakom nie.

Deur dié doeltreffender en makliker roete – in teenstelling met ’n misdaadklag in die hof – word gehoop dat geldwassery (die inbring van die opbrengste van misdaad in die formele finansiële stelsel) en die finansiering van terreur beter aan die kaak gestel kan word.

Smit het gesê ál werklike bykomende verpligting is dat ondernemings wat dienste lewer waar groterige kontanttransaksies plaasvind, hulle by die sentrum sal moet laat registreer. Daar is egter geen registrasiegeld nie en registrasie behoort met ’n gewone faks, of elektronies, gedoen te kan word.

Oor bepalings dat die koste van inspeksies deur toesighoudende instellings van die betrokke instelling – soos ’n bank – verhaal kan word, het Smit gesê die sentrum staan ’n diskresionêre benadering voor.

Die meeste inspeksies sal vinnige roetine-aangeleenthede wees met minimale koste wat deur die toesighoudende instelling se eie begrotings gehanteer sal kan word.

In die geval van spesiale ondersoeke – waar besliste rede tot ondersoek is – moet die toesighoudende instelling egter sy oordeel kan gebruik om die koste van die betrokke onderneming te verhaal.

Smit het gesê die beginsel om inspeksiekoste in die finansiële sektor te verhaal, geld in verskeie oorsese lande.

Hy het ook besware verwerp van die reguleringsliggaam vir ouditeure dat parallelle regulering verwarring en duplikasie skep.

Hy het gesê die toesighoudende liggame sal, afhangende van omstandighede, die gepaste magte kan inspan.

Mnr. Murray Michel, direkteur van die finansiële-intelligensiesentrum, het vroeër ook ontken dat die inspeksiestelsel buitensporige uitgawes vir ondernemings sal meebring.

Die voordele van die wetswysigings daarenteen is dat geen moontlike onnodige, potensieel duur en skadelike strafsake gevoer sal hoef te word nie.