Progressive Investment Holdings (PIH), die onderneming wat die oud-Bok mnr. Joost van der Westhuizen in Maart as bedryfshoof aangestel het, word reeds ’n jaar lank deur die Raad op Finansiële Dienste (RFD) ondersoek.

PIH is een van vier verwante organisasies wat vandeesweek onder voorlopige kuratorskap geplaas is deur die Pretoriase hooggeregshof.

Die aansoek is deur die RFD gebring ná ’n jaar lange ondersoek. In die ondersoek is onder meer bevind dat finansiële dienste na bewering onregmatig gelewer is en die ondernemings glo in stryd met die Wet op Finansiële Advies- en Tussengangerdienste (Fais) opgetree het. Die inspekteurs kon luidens hofdokumente glo ook nie sowat R40 miljoen se beleggersgeld opspoor nie.

Van der Westhuizen het gister in ’n verklaring benadruk hy word nog opgelei as uitvoerende hoof om die leisels in Januarie 2009 oor te neem. Dié verklaring is glo uitgereik omdat die media dit “laat klink” het of Van der Westhuizen PIH bestuur.

“Om die oorgang glad te laat verloop, het die huidige uitvoerende hoof, mnr. Freddie Anda?laft, die pos van bedryfshoof vir Van der Westhuizen geskep,” word gesê.

“Joost is niks meer as ’n werker nie. hy is ook nie ’n belegger, aandeelhouer of direksielid nie.”

Van der Westhuizen het op ’n vraag van Sake24 of hy nou gaan bedank, gesê hy het “geen rede” nie. Hy het gesê dat die kuratorskap nog voorlopig is.

Hy het nie vooraf daarvan geweet nie en dit is “nogal ’n skok”. Volgens Van der Westhuizen het hy tot dusver in sy opleiding (waarvoor ’n persoonlike afrigter aangestel is) nog nie oor die maatskappy self geleer nie, maar hoe ’n finansiëlediensteverskaffer werk.

Hy was vóór sy aanstelling wel ingelig deur Andalaft dat daar ’n ondersoek deur die RFD is. “Hy het gesê daar is geen onreëlmatighede by PIH nie,” het hy gesê.

Uit die hofdokument is dit duidelik dat Andalaft al begin Maart deur die RFD genader is oor alternatiewe vir kuratorskap. ’n Vergadering is gehou sowat ’n week vóór die aankondiging oor Van der Westhuizen se aanstelling.

Volgens hom is die idee dat hy R8 miljoen belê om 10% van die maatskappy te koop wanneer hy uitvoerende hoof word.

Die aansoek om die ondernemings in kuratorskap te plaas, is vandeesweek deur mnr. Gerry Anderson as die adjunk- uitvoerende hoof van die RFD en registrateur van finansiëlediensteverskaffers ingedien.

In die bevindings van die ondersoek die afgelope jaar deur inspekteurs van die RFD is talle beweerde onreëlmatighede.

Die ondersoek het gespruit uit ’n klagte van die likwidateur van die Fraser Lesotho Pension Fund. Dié pensioenfonds het in 2000 miljoene rande by Progressive Investment Trust (die trust) belê. Toe die fonds sukkel om die geld uitbetaal te kry, het dit in Januarie verlede jaar by die RFD gaan kla.

Die verslag van die inspekteurs is 15 Februarie vanjaar aan die registrateur oorhandig en dit het gelei tot die voorlopige kuratorskap van die trust; Progressive Asset Management (PAM); National Financial Partners (NFP); en PIH.

In hofdokumente word Anda?laft as die “brein” agter die ondernemings beskryf.

Ook ander pensioenfondse het by die trust belê sonder dat hy gemagtig was om as finansiëlediensteverskaffer op te tree. Dit sluit in fondse van die SA Studbook Provident Fund wat deur die makelaar PSG Konsult by die trust belê is.

Geeneen van die fondse se beleggings is terugbetaal nie.

In Andalaft se beëdigde verklaring word ook ’n verwysing na Ovation (wat ook onder kuratorskap is en bande het met Fidentia) gevind. Ovation was glo voorheen sy administrateur.

Die naam van ’n meer agtenswaardige fondsbestuurder word ook genoem – dié van Dynamic Wealth Management, wat glo Progressive Asset Management se effektetrusts bekom het.