Daar is eerder steun vir planne dat Coega ’n kragstasie van sowat R6 miljard vir die Nelson Mandela-metro tot stand bring.

Só ’n inisiatief het die steun van die uitvoerende burgemeester, me. Nondumiso Maphazi, verskeie ministers en belangstellende rolspelers, het mnr. Pepi Silinga, uitvoerende hoof van die Coega-ontwikkelingskorporasie (COK), gesê.

Dié kragstasie sal bydra tot die basislading en sal nie net ’n kragaanleg vir die vraag in spitstye wees nie.

Silinga het Woensdagaand op die jaarvergadering van die plaaslike sakekamer Percci gesê die Coega-nywerheidsontwikkelingsone (NOS) sal nie tot stand kom soos aanvanklik in die vooruitsig gestel is nie.

Buiten die dilemma wat die land se energiekrisis veroorsaak het, het ’n Australiese maatskappy wat op die punt was om in Coega te belê, sowat drie weke gelede in ’n kort nota laat weet hy wil eers sien wat in Zimbabwe gebeur voordat hy enige ooreenkomste onderteken.

Mnr. Siya Mhlaluka, Percci-president, het ook verwys na die nadelige impak van die onsekere situasie in Zimbabwe op Suid-Afrika en die streek se ekonomie.

Sou die aluminiumsmelter deur Rio Tinto Alcan nie voortgaan nie, sal dit nie die grondslag van die Coega-projek ondermyn nie. “Alcan het nie die sakeplan vir die Coega-projek geskep nie en sal dit ook nie uitvee indien sy smelterprojek van die baan is nie,” het Silinga gesê.

Coega is ’n langtermynprojek en uiteindelik sal daar ’n aluminiumsmelter by die nuwe hawe wees – dalk vir Alcan of ’n ander rolspeler.

Silinga het gesê hy kan nie voorgee dat hy weet wat in die toekoms gaan gebeur nie, maar as ’n mens nie die rigting van die wind kan verander nie, moet jy jou seile daarby aanpas.

Dít beteken die idee van ’n NOS moet dalk laat vaar en eerder na ’n ekonomiese sone gekyk word. In die verlede is gefokus op sektore soos metallurgie, elektronika en voertuigvervaardiging vir Coega, maar dit het nie bio-brandstof en mariene kultuur ingesluit nie, het hy gesê.

Miskien is dit nou tyd vir ’n park vir die uitkontraktering van sakeprosesse (BPO), met Absa wat reeds ’n kontaksentrum by Coega het.

In die eerste maand het dié sentrum sy teikens oortref. Sowat 90 mense, almal voorheen werkloos, is in diens en daar word oorweeg om die sentrum uit te brei tot 600 plekke, het Silinga gesê.

Dít wys dat daar in ’n ander rigting gedink word vir die toekoms.