Mnr. Trevor Manuel, minister van finansies, het gister weer verreikende veranderings aan vanjaar se indieningstelsel bekend gemaak.

Dit is deel van die moderniseringsproses wat verlede jaar met die minder en korter opgawes begin het.

Die indieningsveldtog vir die 2008-belastingjaar begin op 1 September en die sperdatum waarteen individue hul opgawes moet indien, is 21 November.

Elektroniese indieners het tot 23 Januarie volgende jaar tyd om hulle s’n in te dien. Tans is meer as ’n miljoen belastingbetalers as elektroniese indieners geregistreer.

Een van die belangrikste veranderings vanjaar is dat werkgewers ’n nuwe vorm kry waarvolgens die salarisinligting van hul werknemers gekonsolideer moet word.

Dié vorm is glo aansienlik eenvoudiger, maar werkgewers kry tot 29 Augustus tyd om te sorg dat die konsolidasie by die Suid-Afrikaanse Inkomstediens (SAID) ingedien is.

Gebeur dit nie, kan hulle ’n boete van 10% van die lopende betaalstelsel opgelê word.

Een van die groot probleme verlede jaar was klaarblyklik dat die inligting wat werkgewers verskaf het, verskil het van die inligting waaroor die SAID beskik het. Dit het ’n heen-en-weer-verskuiwing van dokumente teweeg gebring. Minstens ’n miljoen belastingbetalers het nie ’n aangename indieningservaring gehad nie.

Mnr. Edward Kieswetter, bedryfshoof van die SAID, het in ’n inligtingsessie gesê die tweede belangrike verandering is dat belastingbetalers se IRP5-inligting vanjaar reeds op hul uitgereikte opgawe-vorms gaan verskyn.

Mnr. Barry Hore, hoof van strategie, modernisering en tegnologie van die SAID, sê werkgewers gaan gratis programmatuur kry waarmee die rekonsiliasies gedoen kan word.

Die belastingbetaler moet steeds seker maak dat dit wat op hul vorms verskyn, ooreenstem met wat op hul IRP5-sertifikaat staan.

Nog ’n belangrike kwessie is dat geen individuele opgawes vanjaar gepos gaan word nie. Belastingbetalers gaan wel ’n brief van die SAID ontvang waarna hulle kan versoek dat ’n opgawe-vorm gepos word en dan sal hulle die keuse kan uitoefen hoe hul opgawe moet lyk.

Soos verlede jaar, sal die vorms elektronies beskikbaar wees. Mense wat minder as R120 000 verdien, een werkgewer het en geen ander inkomste of aftrekkings het nie, hoef nie ’n opgawe in te dien nie.

Mnr. Pravin Gordhan, kommissaris van die SAID, sê die nuwe inisiatiewe is nie uniek aan Suid-Afrika nie. “Ons volg die internasionale norm.”