Ramos het gister skerp gereageer op ’n berig wat Sondag in die Sunday Times verskyn het.

Dié berig het beweer dat Transnet met die verkoop van die V&A Waterfront in 2006, ook “22 km se kuslyn en 90 km2 van die see van Tafelbaai tot Robbeneiland aan buitelanders verkoop het”.

Die Sunday Times hou egter voet by stuk. Dié Sondagkoerant se redakteur, Mondli Makhanya, het gister aan Sake24 gesê die Sunday Times se berig is waar en sal altyd waar bly en Transnet weet dit.

“Ons het ondersteunende bewyse wat die feite in ons berig bevestig.”

Ramos het die koerant beskuldig van onverantwoordelike, vals en misleidende beriggewing wat Transnet sowel as Suid-Afrika groot skade berokken het.

“Transnet se verkope van die V&A het nooit die see-gebiede ingesluit wat in die berig genoem is nie. Die see en die seebodem behoort in elk geval nie aan Transnet nie.”

Ramos sê verder die verkooptransaksie het ook nie in die geheim plaasgevind nie – soos deur die berig beweer is.

“Dit was ’n deursigtige openbare tenderproses wat reeds 18 maande gelede afgehandel is. Al die nodige regerings- en korporatiewe-goedkeuring vir die verkooptransaksie is verkry.”

Dié proses het behels dat Transnet sy 26%-belang en sy drie pensioenfondsvennote hul 74%-belang in die V&A verkoop het aan ’n konsortium met die naam Lexshell. Lexshell behels die Britse groep London & Regional (50,1%), die Doebaise beleggingsgroep Istithmar (24,8%) en ’n SEB-konsortium (25,1%). Die verkoopsprys was R7,04 miljard. Nege ander bieërs het destyds aan die proses deelgeneem om een van Suid-Afrika se voorste toeriste-attraksies te verkry.

“Die verkoopooreenkoms sluit verder geen waarborge of ondernemings in ten gunste van die kopers wat betref die verwagte ontwikkeling van die V&A Waterfront nie. Die R20 miljard-eis wat die Sunday Times beweer teen Transnet ingedien kan word, is pure duimsuigery,” het Ramos gesê.

Volgens haar oorweeg Transnet al sy opsies ten opsigte van stappe teen die Sunday Times.

“Ons doen geweldige moeite om Transnet op te bou en baie is reeds in die maatskappy belê in ’n poging om die maatskappy om te keer. Gevolglik het ons ons prokureurs vanoggend (gisteroggend) opdrag gegee om ons saak te oorweeg en om te bepaal of die Sunday Times-berig verantwoordelike joernalistiek was.”

Makhanya sê die Sunday Times staan by sy berig en wag op Transnet se regsaksie.

Intussen het die vakverbond Cosatu ook die verkoop van die V&A gister skerp veroordeel. Die vakverbond se woordvoerder, mnr. Patrick Craven, sê koppe moet rol. “Die verkoop van die V&A is die perfekte voorbeeld van wat die probleem is met die kommersialisering van semi-staatsinstellings soos Transnet. In plaas daarvan dat hulle dienste verrig vir die mense van Suid-Afrika, verkoop hulle ons eiendomsreg aan buitelanders.”

Teken in op Beeld, Die Burger of Volksblad om jou Sake24 elke dag te kry